کولت. آذ آذربایجانین گؤرکملی شاعری رامیز رؤوشنین "کؤهنه مکتوبلار" شعرینی تقدیم ائدیر:

خبر گلر داها عؤمرون قیشیندان،
سویویارسان ساچلارینا قار دوشر.
آنجاق کؤهنه کیتابلارین ایچین‌دن،
هردن-هردن کؤهنه مکتوبلار دوشر…

اییلرسن، گؤتوررسن گیزلیجه،
بویلانارسان آرواد اوشاق گؤرمه‌سین،
چکیلرسن اوتاغین بیر کونجونه
گیزلی گیزلی اوخویارسان هر سؤزو…

بو نه سئوگی مکتوبودو، ایلاهی،
ایندییه‌جه‌ن آغرییر هر سؤزو ده،.
یازان قیزین نیدی آدی ،ایلاهی،
یاددان چیخیب سیفتی ده اوزو ده…

اوخودوقجا لال سطیرلر سسلنر،
یاواش-یاواش سسی دوشر یادینا.
بیر حرفدن- قاشی دوشر یادینا،
بیر حرفدن گؤزو دوشر یادینا…

او گؤزلردن یادیگار تک واراق‌دا،
گؤز یاشینین لکه‌سینی گؤررسن.
بیردن دونو خیشیلدایار اوتاق‌دا،
پنجره‌ده کؤلگه‌سینی گؤررسن…

دیکسینرسن،بویلانارسان قاپییا،
«او کؤلگه‌نی آرواد اوشاق گؤردومو؟»،
تئز مکتوبو آتارسان کول قابییا،
یاندیرارسان هر سؤزونو سطرینی…

سؤزلر یانار-کاغیذی دا یاندیرار،
سؤزلر یانار-او قیزی دا یاندیرار.
سؤزلر قاچار او آلووون ایچیندن،
سن باخدیقجا- باسار سنی سویوق تر،

سیرا-سیرا قارا قاریشقارالار تک،
قاچیب گئدر قارا-قارا حرفلر…
تکجه او قیز قاچا بیلمز بو اوددان.
بیر قوش اولوب اوچا بیلمز بو اوددان.

او قیز یانار او آلووون ایچین‌ده،
گؤیه قالخار او آلووون دیللری.
او آلووون دیللرینه سارماشیب،
یانار،یانار اوزون-اوزون تللری.

یانار بیر واخت ساچلارینی اوخشایان،
اوزون-اوزون بارماقلاری،اللری…
او قیز یانار-ارشه چیخار توستوسو،
کاغیذ یانار-کول قابی‌دا کوللنر.

قفیل بیردن کول قابینین ایچیندن
یئره دوشوب بیر اوزوک دیگیرلنر…
لاپ اؤزونو ایتیررسن،باخارسان،
او اوزویو گؤتوررسن-باخارسان،

بو اوزویو آخی هاردا گؤرموسن؟
بو اوزویو گؤرممی‌سن بلکه هئچ.
سن او قیزا هاچان اوزوک وئرمیسن؟
اونا اوزوک وئرمه‌میسن بلکه هئچ…

آروادین دا قفیل گیرر قاپیدان:
-الین‌ده‌کی ندی؟-دئیر
– اوزوکدو.
– او اوزویو نه یاخشی کی،تاپمیسان،
نئچه واختدی ایتیرمیشدیم،گزیردیم.
سونرا گلر ،سن‌دن آلار اوزویو،
– بونون رنگی نیه بئله قارالیب؟
بارماغینا گوجله سالار اوزویو،
– ائله بیل کی،بیر بالاجا دارالیب…

کولقابیدان توستو قالخار هله‌ده،
او مکتوبون کولو هله ایشارار.
ماددیم-ماددیم دوروب باخار آروادین،
او توستودن بیر جوت گؤزو یاشارار…

– هئچ اولماسا پنجرنی آچ،- دئیر.-
بوردا نئجه اوتورموسان سن،نئجه؟
بو نه یانیق قوخوسودو، ایلاهی،
ائله بیل کی، آدام یانیب ایندیجه….