تبریزین «ماشینسازی» فوتبول کلوبو ایران فوتبول فدراسییاسینین باش مشق‌چی رسول خطیبی باره‌سین‌ده چیخاردیغی عدالتسیز قرارا اعتراض بیلدیریب.

آخار. آذ خبر وئریر کی، فوتبول فدراسییاسینین اینضیباطی کمیته‌سینین چیخاردیغی قرارا گؤره، «ماشین‌سازی»نین باش مشق‌چی‌سی ۱۰۰ میلیون ریال مبلغین‌ده جریمه اؤد‌مه‌یه محکوم اولونوب. او همچینین بیر گؤروش‌ده کومان‌داسینی موشایعت ائتمک‌دن محروم ائدیلیب.

«ماشینسازی» کلوبو اینضیباطی کمیته‌نین قراری ایله باغلی اعتراض مکتوبو یازیب.

««ماشین‌سازی»نین تکنیکی هئیتینین اعتراض ائتدیی پنالتی قراری اعلان اولوندوقدان سونرا «پرسپولیس» طرفدارلاری بیرلیک‌ده رسول خطیبینین عنوانینا معین خوشاگلمز سؤزلر سسلندیردیلر. باش مشق‌چی بونا ال چالاراق رئاکسییا وئردی. بون‌دان سونرا آزارکئشلر سؤزلرینی دییشه‌رک رسول خطیبینین عائله‌سی و عزیزلرینین عنوانینا ان آلچالدیجی سؤزلر دیله گتیردیلر. بو مسئله بؤیوک عکس-صدا دوغوردو.

نئجه اولور کی، ۵ مین آزارکئشین ائتیکادان کنار ان اخلاق‌سیز شعارلار سسله‌ندیرمه‌سی اوچون ۳۰۰ میلیون ریال جریمه نظرده توتولور، لاکین باش مشقچینین ساده‌جه ال چالماسی ۱۰۰ میلیون ریال جریمه و بیر گؤروشده کومان‌دانی مشایعت ائتمکدن محروم ائدیلمه ایله نتیجه‌لنیر؟! «ماشین‌سازی» کلوبو بونا اعتراض ائدیر. اونا گؤره کی، چیخاریلان حکم هئچ بیر شکیل‌ده رئاللیغا اویغون گلمیر.»- دئیه مکتوب‌دا قید اولونوب.