کئچه‌ن گونلرده ایران آذربایجانی و تبریزین مشهور تراکتور کومان‌داسینین ۴ فوتبول‌چوسونون کوروناویروسا یولوخما خبرین‌دن سونرا بو دفعه ایران فوتبول سوپئر لیقاسین‌دا یاریشان تبریزین دیگر کومان‌داسی ماشینسازی کلوبونون فوتبول‌چولارین‌دا کوروناویروس آشکارلانیب.

آخار. آذ خبر وئریر کی، تبریزین ماشینسازی کلوبونون ایجتیمایتله علاقه‌لر شبه‌سی بو باره‌ده معلومات یاییب. کومان‌دا فوتبول‌چولارین‌دان آلینان تئستلر نتیجه‌سین‌ده بو کومان‌دانین ۶ فوتبول‌چوسونون کوروناویروسا یولوخدوغو معلوم اولوب. کلوبون هکی‌می مسعود عباس‌زاده بیلدیریب کی، تئستلرین سونوجو سلاهیت‌لی لابوراتورییا طرفین‌دن تصدیقلنیب و کلوب رسمیلرینه بیلدیریب.

کومان‌دانین ۶ فوتبول‌چوسون‌دا کوروناویروسون آشکارلانما خبری تسدیقلندیک‌دن سونرا کومان‌دانین کاپیتانی عزیز معبودی وارزئسه۳ پورتالینا وئردیی موصاحیبه‌ده دئییب کی، «فاجعه‌نی آنلاماق اوچون دئمه‌لییه‌م کی، بیر هفته تئستلری آلماق‌دان اول کومان‌دانین بوتون فوتبول‌چولاری بیرلیک‌ده ایدیلر و اگر بو گون بیر داها فوتبول‌چولاردان تئست آلینارسا شوبهه‌سیز ۱۶ فوتبولچونون ویروسا یولوخدوغو اورتایا چیخار.»

معبودی همچینین دئییب کی، «آلمانییانین اینفراستروکتورو و ایمکانلاری بیزده یوخ‌دور، اوردا لیقانی باشلاتماق اوچون بیر هفته اؤنجه‌دن فوتبول‌چولاری و عائله‌لرین کارانتینه آلاراق تئستلر آلیرلار، داها سونرا مشقلره باشلاییرلار، اما بیزده او ایمکانلار یوخ‌دور، من کومان‌دانین ۱۵ باشقا فوتبول‌چوسو ایله بیرلیک‌ده بیر هوتئل‌ده یاشاییرام. اگر ویروسا یولوخان ۶ نفردن بیری بیزیمله یاشاییرسا کسین بیزیم هامیمیزا ویروس یولوخوب.»

مایین ۲۷-ده پارس-جنوبی-جمع آدلی ایرانین فوتبول سوپئر لیقاسینین باشقا بیر کلوبو بیلدیریش یایاراق فوتبول‌چولارینین ۴-نون کوروناویروسا یولوخدوغون بیان ائدیب. داها اؤنجه ده سئپاهان کومان‌داسین‌دا ۲، سایپا کومان‌داسین‌دا ۱ و گولگوهر-سیرجان کومان‌داسین‌دا ۶ فوتبول‌چودا ویروسا یولوخما حالی آشکارلانمیش‌دی.

ایرانین سوپئر لیقا کلوبلارینین فوتبول‌چولارین‌دا یولوخما حاللارینین آرتماسینا باخمایاراق ایران ایدمان رس‌میلری ماتچلارین باشلادیلماسین‌دا ایسرارلیدیرلار. بو باره‌ده ایرانین ایدمان تیبب فئدئراسییاسینین سؤزچوسو مایین ۲۷-ده وئردیی موصاحیبه‌ده لیقانین ائرته‌له‌نمه‌سی و یا لغوی باره‌ده هئچ بیر قرارین اولمادیغینی بیلدیریب.

مایین ۲۴-ده تراکتور کومان‌داسینین باش مشق‌چی‌سی کومان‌دانین ۴ فوتبول‌چوسون‌دا یولوخما حالی آشکارلاندیق‌دان سونا بوتون فوتبول‌چولاردان بیر داها تئست آلیناجاغینی بیلدیریب، آنجاق کلوبون رس‌میلری تئستلرین نتیجه‌سینی هله آچیقلاماییب.