آنا صحیفه کولت |
کولت. آذ فرانس کافکانین "کؤرپو" حکایهسین تقدیم ائدیر:
برک و سویوق ایدیم، بیر کؤرپو ایدیم، یارغانین قاباغیندا اوزانمیشدیم. بیر طرفه آیاقلاریمی، او بیری طرفه ده اللریمی اوزالتمیشدیم؛ اووولوب تؤکولن زیغ تورپاغی مؤحکم قوجاقلامیشدیم. پالتاریمین ساچاقلاری بؤیرومدن ساللانیب یئلله نیردی. چوخ آشاغی لاردا بوزلو قیزیل آلا آخینی شیرهاشیر شیریلداییردی.
بیرجه نفر ایندییه کیمی یولونو ایتیریب ده بو سیلدیریملیغا گلمه میشدی، بو کؤرپو هله هئچ بیر یئرده تصویره چکیلمه میشدی. بئلهلیکله، اوزانیب هئی گؤزله ییردیم؛ گؤزلمکدن سونرا آیری چارم یوخ ایدی.
بیر گون آخشام چاغی ایدی – بیرینجی دفعه ایدی؟! یوخسا مینینجی دفعه ایدی؟! دئیه بیلمه رم –فیکیرلریم هر زامان بیر-بیرینه قاریشیر، دایانمادان بئینیمده دولانیرلار.
بیر یای آخشامی ایدی، آخینین نریلتیسی همیشه کیندن داها گورولتولو ایدی. ائله بو واخت آددیم سسلری ائشیتدیم. منه طرف گلیردی!
قامتینی دوزلت، آی کؤرپو! حاضر اول! سنه گووه نیب طرفینه گلمیش قوناغینا یاردیم الینی اوزالت. آددیملاریندا اینامی یوخسا، اونون آددیملارینا دوز یولو گؤستر. آنجاق سنین مؤحکملییینه اینانماسا ، بو داغلارین تانریسی کیمی اونو گؤتور، داشلارا چیرپ.
او گلدی، چلییینین دمیر اوجلوغو ایله منی تاققیلداتدی، سونرا پالتاریمین ساچاقلارینین اوزه رینه قالخدی و چلییینی منه چیرپا-چیرپا یئریدی. چلییینی قالین ساچلاریما باتیردی، باخیشلاری ایله اطرافا گؤز گزدیردی، اوزون زامان چلییینی ساچلاریمین آراسیندا ساخلادی. بیردن-بیره بدنیمین اورتاسیندا ایکی آیاغلی قالخاراق آتیلدی. نه باش وئردییینی بیلمه دن بؤیوک آغری ایچیمی تیترتدی.
او کیم ایدی؟!
رؤیا ایدی ؟!
یولچو ایدی؟!
اؤزون اؤلدورمه یه چالیشان بیری ایدی؟!
قاتیل ایدی؟!
اونو گؤره بیلمک اوچون چئوریلدیم. ائله آزجا چئوریلمیشدیم کی، اوچماغا باشلادیم، چؤندوم، تیکه-تیکه اولدوم. پارچالانیب هر زامان منه ساکیتجه باخان سیلدیریم قایالارین سرت اوجلارینا پرچیمله نیب قالدیم.
چئویرن : یاسین قربانی
تاریخ
2020.06.03 / 19:09
|
مولف
الشاد یاقوبلو
|