آنا صحیفه کولت |
کؤچورن: فرخ جرایدی
" بو تلگراملاریم هم ترجمهسی هم تهرانداکی روس ائلچیلیگی و هم ده پترزبورگدا اورتا دوغو ایشلری مودورو ' کلئم'-ه گؤندهریلمیشدیر، بونا گؤرهده روسیهنین بورالاردا جدّی ایشلره باشلایاجاغی شبههسیز دیر. "
" مساله آیدین دیر بیز رهبرلرین عثمانلی کونسول خاناسیندا اوتورمالاری سونوجوندا آزربایجانین بیر فلاکت قارشیسیندا دوراجاغینی بیلیریک، لاکن بیز اونلاری باشا سالا بیلمهدیک کی آلمان دوست-و اولماق باشقا، آلمان آلت-ی اولماق ایسه باشقا دیر. " دئدیم.
" سونوج میداندادیر " دئیه نینا عصبلشدی. " بو گۆنلر شیروان آلایینین ارکان حَرب ضابطلریندن ایکی نفر، ۲۱-اینجی توپچو آلایینین باشچیسی و باشقالاری خوی شهرینه گئدهجک و اورادا یئرلشدیریلهجک روس اوردوسونون یئرینی بللی ائدهجکلر.
بوندان باشقا ماکیْ خانلیغی مستقل بیر خانلیق حساب اولدوغوندان اورادا روس کونسول خاناسینین تشکیلی اۆچون پترزبورگ و تهراندان اَمرلر آلینمیشدیر. حتی آلفردو-نون ماکیْ کونسوللوغونا سئچیلدیگی گؤزلهنیلیر. اورمودا و ساووج بولاق طرفلرینده ده کونسوللوق تشکیل مسالهسینی دۆشونورلر. بو باره ده تبریز، تهران و پترزبورگ آراسیندا دانیشیلیر. آلمانلارین تحریک لری روسلارین الینه بهانه وئریر کی، بو دا عثمانلی لاری تهدید ائدن گلهجک فلاکتلرین باشلانغیجی دیر. "
" دوغرودور، آلمان هابئله روس امپریالیزمینین توققوشاجاغی شبههسیز دیر. روسیه بغداد دمیر یولونو تهدید ائتمک، تۆرکییهنین آنادولو اؤلکهلرینین اشغال ائتمک اۆچون بیر بهانه آختارماقدا دیر. بونا انگلیسلر ده طرفدار دیر، چۆنکو بغداد دمیر یولو روسیهنی دئییل انگلیسی داها چوخ تهدید ائدیر. "دئدیم.
" بس بیز نه ائتمهلیییک؟ " دئیه نینا سوروشدو.
" بیز کۆتلهلری ایران سوسیال-دموکرات فرقهسینین چئورهسینده توپلامالی، روسلارین حیلهسینی آچیقلامالی، سیاسی جریانلارین قارشیسینی آلمالی، انقلابی حرکاتین گۆجلنمهسینه چالیشمالیییق. بورادا سیزین اۆزهرینیزه داها اؤنملی بیر گؤرو دۆشور. سیز بیزیم ایشلریمیزی محکملندیرمهلیسینیز. "
نینا سؤزومه قوّت وئرهرک:
" ایران انقلابی، روسیهده باش وئرن بئشینجی ایل انقلابینین بالاسیدیر، اونو روسلار دا بوغماغا چالیشیر. بیز ایندیلیک بؤیوک بیر آغاجین کیچیک بوداقلاری ایله دؤیوشدهییک. لاکن روسیه اؤز کؤلگهسی آلتینا آلمیش، بوداقلارینی دوغونون هر یانینا اوزالتمیش بو آغاج کؤکوندن قوپاریلمایینجا، بیز دؤیوشده غالب چیخا بیلمهیهجهییک "دئیه آیاغا قالخیب اوتاغین ایچهریسینده بیر-ایکی باش گزدیکدن سونرا، " قالخ دیْشاری چیخالیم، قالخ اۆرهییم پارتلاییر. " دئدی.
تاریخ
2019.07.12 / 10:36
|
مولف
محمد سعید اردوبادی
|