آنا صحیفه کولت |
سانال دونیا، گؤرولموش ایشلرین خبرینی یایماقدا ان گوجلو آراج اولاراق، دونیامیزدا یاییلماقدادیر. سانال دونیا یارانماغلا توتالیتئر دیکتاتورلوقلارین سانسور، دوندورما و بایکوت گوجلری داها چوخ آزالدی. بو تیب حوکومتلرین ان وحشتلیسی-ییرتیجیسی گونئی آزربایجانا زهرینی تؤکن ایرانین «ایسلامی جومهوریسی» حوکومتیدیر.
اونوتمامالیییق کی، رئژیم گئرچک فضادا ایشلرینی گؤرهرک آزربایجانیمیزی سومورگهچیلیگ دورومونا سالیر، سانال آلانیندا یوخ! اونون قارشیسینا چیخما دا، گئرچک فضادا اولمالیدیر آنجاق خبرلری سانال دا یاییلمالیدیر.
گووهنیمیزه گؤره بیز «گونئی آزربایجان تورک میللتی» ۴۰/۴۵ میلیونلوق بیر اولوسوق و دونیا بویو شان-شؤهرتیمیز واردیر، رئژیمدن ده بول-بول نیفرتیمیز و بونو بوگونده ان آزی گؤرکملی «تراختور فوتبال تیمیمیزین» یاریشلاریندا دؤنه-دؤنه گؤروروک. آما مجازی فضادا گئدن اوی آلما و کمپئینلرده گؤرونور چوخ دا باشاریلی اولابیلمیریک و ییغدیغیمیز اویلار اؤنملی دئییل هئچ، آبیر آپاران دا اولور بئله بیر دوروم بیزه دئییر:
میللی-سیاسی چالیشقانلاریمیز یا داها چوخ چیلپاق دئمک ایستسک «تشکیلاتلاریمیز» ائل ایچینه یولآچیب اونا یؤن وئریب میللی حاقلاریمیزی دوشوندوروب، درینلهدیب، یوکسلده بیلمهدیکدن قویولان کمپئینلرده اوی ییغانمیرلار. قورتولوش ائلین الینن اولابیلیرسه اوندا آیدینلار، اؤنجوللر، سییاسال تشکیلاتلاریمیز گرک ائل ایچینه گئدیب گؤردویو ایشلرله موباریزهنی درینلشدیمه و میللی هدفلر اوزرینده یؤنلشدیرمهلیدیرلر و بو دا سانال آلاندا یوخ گئرچک فضادا اولمالیدیر. ایهر یارانمیش فارس ایستعمار سیستئمینی سونوجدا ائل گوجو سیلیب-سوپوروب تاریخ زیبیلقابینا آتابیلر، بس بو قورتولوش قالخیشین اصلی یییهسی، مالیکی-صاحیبی ده ائله ائل اؤزودور و هئچ بیر قوروپلاریمیز یا شخصییتلریمیز اونو اؤزونه یا اؤز قوروپونا یا گوروپلاربیرلشیکلرینه یییلنمه حاقلاری یوخدور.
باشقا سؤزله ایستعماردان قورتولوش قییامینی هئچ کیمسهنین موصادیره ائتمه حاققی یوخدور. ایندی دوروم بئلهدیر کی، سیاسی فعالاریمیزین چوخو ائل آیدینلیغینا ایش گؤرمگی یوخ بلکه مجازی فضادا های-کوی سالیب اؤزلرینه شؤهرت قازانماق آختاریرلار، اما کمپئین یولاسالیب اوی توپلایاندا گؤرونور ۴۰-۵۰ یا ان چوخو ۲۰۰-۳۰۰ دن آرتیق اولابیلمیر، بو دا اوزه چیخاندان سونرا کی، مجازی دونیادا دانیلمازدیر، باشیمیزا قاخ اولور کی، بس هانی او ۴۰-۴۵ میلیون ساییسی اولان گونئی آزربایجان تورک میللتی؟! بو دوروم حوکومتین ۴-گؤزلو باخیشینی-نظرینی اؤزونه آلاراق سیاسی تشکیلاتلارلا ائلیمیزین هله ایندییهدهک بیر-بیرینه قوووشابیلمهدیگینی بیلدیریر و اونو ۴۰-ایل حاکیمیت سورندن سونرا دا ذرهجه ده میللی حاقلاریمیزدان وئرمهدییینی حاقلی سانیر و وئردیکلرینی ده آلماغا یا ایچدن دییشیب پوکلتمهیه، ندن اولور و شانیمیزی، اعتیباریمیزی ان آزی قیسا زاماندا یئنیلدیر.
گؤرونور بو یانلیشلیقلار مجازی فضانی بیز گونئی آزربایجانین چالیشقان تورکلرینه و میللی-سیاسی قورولوشلارینا نعمتدن نئکبته دوغرو یؤنلدیر و ترس سونوجا گتیریب-چیخاردیر. بو کی، من گئتدیم و فیلان یاییلمیش کمپئینده قول چکدیم داها بسیمدیر و گؤروی یاپدیم داها آرتق چالیشما و باشقا ایشلرده یا موباریزه مئیدانلاریندا اولمانین گرگی منیم اوچون قالمادی ان بؤیوک یانلیشلیقلارداندیر. بئله یانیلمالار هم تکیل(فردی)،هم توپلوم باخیمیندان ایندی بیزیم میللی ترپهنیشیمیزین ان بؤیوک آفتلریندهن بیری ساییلیر کی، گئتدیکجه ده آرتماقدادیر. بو، او دئمک دئییلکی، مجازی آلاندان الچمهلیییک، یوخ ترسینه دوشونجهمیزی و داورانیشلاریمیزی اونا نیسبت دییشیب-دوغرولتمالیییق. بو تئکنولوژی گوجو ایله یارانمیش مجازی دونیا گئرچک آچینین تایی-معادیلی یا رقیبی اولابیلمز-ساییلابیلمز، تکجه-بیرگه یاردیمجیسی و موکمیلی اولابیلر و یئری همیشه ایکینجی دورومدا اولمالی-قالمالیدیر. مجازی دونیا گئرچک دونیامیزین گؤرولموش ایشلرینین خبری، آچیقلامالاری یاپیلان، یاییلان یئری اولمالیدیر.
میللی حرکتیمیزده میللی منفعتلری منیمسمهیه چالیشان فعاللارمیز بونو بیلمهلیدیرلر کی، میللی حاقلاریمیزین اؤزو یا ایمتییازلاری بؤلونن و بیر کیمسهیه، یا قوروپا پایلانا بیلن دئییل، اؤرنکجه اورمو گؤلونو نظردن کئچیرسک؛ نئجه بو گؤلون قوروماقدان گلن زییانلاری، موصیبتلری بیر کیمسهیه بؤلونمز، صاباح احتیمالن دولوب اؤز یئرینی توتسا دا یئنه ده خئییرلری و منفعتلری بؤلونن دئییل.
ائلهجهده یارانان فضانی منیمسمهیه چالیشان شخصلرین ایشی، میللی موباریزهمیزی یوخ ائدهجک حددینده، بیر آلیزلیقدیر(مرضدیر) کی، هم فیلان ایدیعاچی شخصی هم توپلومو یازیق ائدر و اؤلومجول دوروما قایتاریب چیخاردار.
تاریخ
2019.07.14 / 19:17
|
مولف
Axar.az
|