آنا صحیفه کولت |
یاشام اونون اوچون ائله گتیردی، گونئی آذربایجاندان قوزئی آذربایجانا کؤچمک زوروندا قالدی. باکیدا بیر نئچه ایل یاشاسا دا، یئنیدن باشقا بیر یؤنه، آوروپایا اوز توتمالی اولدو. بوتون بونلار اؤتن یوزیلین ۹۰-جی ایللرینده باش وئردی. چوخلاری اونو شن، گولروز بیر اینسان کیمی تانیییر. آنجاق، بوتون بونلار هئچ ده دیشیندا اونون گؤرودویو کیمی دئییل. بوتون آجیلاری، ایچینی، دویغولارینی بوتون یاشامی بویونجا گمیرهن دردی اوریینین درینلیکلرینده، بیر شعیرلرینده یاشانیلیر.
اؤزو ایله ایلگیلی آچیقلامالاریندا بونلاری دئییب: «۱۹۶۶-جی ایلده گونئی آذربایجاندا فارس رژیمینین "سیهرود"لاشدیردیغی "سویاری" کندینده دوغولموشام. دیلیمیزن گؤزللیکلرینین وورغونویام. اؤز دیلیمده اوخول گؤرمدیم، کینو گؤرمدیم، کیتاب گؤرمدیم. اؤز دیلیمده یالنیز آنامین ناغیللارینی دینلدیم بوتون اوشاقلیغیم بویونجا. گنجلییمده قوشوغون آخیجیلیغی، سسلرین اویوشومو منی اؤزونه چکدی. علیم یازماغا گلدی. اؤز دیلیمده یازماغین دادینا واردیم. سئودیم... سئودیم ... سئودیم... بو دیلی، بو یازینی، بو ادبیاتی... ایلک بیتییمین آدی "بئچهلر بانلایاندا" اولدو. هاراداسا ۱۹۹۰-جی ایلده تبریزده اؤزومون الیازماملا، کپی اولاراق بیر نئچه یولداشیملا یایدیق. سونرالار ۱۹۹۵-جی ایلده آلمانییادا بیر نئچه داها یئنی قوشوقلا بیرلیکده ائله ایلک آدییلا باسدیردیم. ایکینجی بیتییم "باداملیقلار" اولدو. ۲۰۰۵-جی ایلین مایینده باسیلدی. اونجوسو ایسه یئنه تربیزده یئنه ایسبن-سیز اولاراق گیزلی اولاراق اولوسال ساواشیمیزین سئویملی آدی اولان سعید متینپورا سونولموش قوشوقلاریملا بیرلیکده باسیلیب یاییلدی. "تامودان گلن سسلر" آدلاندیردیغیم بیتیین بوتون ایشلری سئوگیلی یازار، گؤزل گوندج (قزئت) یازاری رامین جبارلینین اوزرینده اولوب. هلهلیک دیرییهم، نوروژده یاشاییرام. یاشامی، بوتون چاتیشمازلیقلارییلا سئویر، اونو بوتون اینسانلارلا، اؤزللیکله گونئی آذربایجان اینسانییلا عدالتلی پایلاشماق اوچون ساواشیرام. قوشوغومون دا، اؤزومون ده قایغیم اینسانین اؤزگور، دینج، باریشجیل بیر اورتامدا یاشاماسیدیر.
تانیدیغیم قادین
بیر قادین تانیییرام
بورالاردان اوزاقدا...
بیر قادین تانیییرام بوز باغلامیش اللرینده
بوز پارچاسی...
باخامماز کول اولموش گونشه،
کؤمور بولودلارین پوزوق کؤینییندن.
بیر ائو تانیییرام،
بورالاردان اوزاقدا بیر ائو تانیییرام.
آستاناسیندا اکدیک اورکلریمیزی
و گونشه اوزانان یوللاریندا قوللاریمیزی.
آستاناسیندا اکدیک اورکلریمیزی
و گونشه اوزانان یوللاریندا قوللاریمیزی.
نه آستاناسیندا گونش بیتدی،
نه یوللاریندا ایشیق بیتمهدی.
بیر اورمان تانیییرام،
بورالاردان اوزاقدا بیر اورمان تانیییرام.
ویییل-ویییل اثر قارانلیق دؤشلرینده دوز کولکلری،
هارایلاری سینهسینده دوستاق،
ماوی باخیشلاری گؤز چاناغیندا.
بیر قادین تانیییرام،
بورالاردان اوزاقدا بیر قادین،
قارا گؤزلرینده حسرت گونشی.
بیزده هر ائو قوروقچوسو بیلینمهیهن زینداندیر
و هر قاپی
اؤلومه آچیلان بیر جیغیرباشی!
گئجهلر
یئل قوناق گلیر قامیشلیغا
و گوندوزلر
گونش آلتیندا
اؤلوم ماهنیسی اوخویور میزراقلار.
آه ای ائشیدن قولاقلار!
تاریخ
2019.08.19 / 15:59
|
مولف
Axar.az
|