آنا صحیفه کولت |
بیر نئچه خاریجی اؤلکهدن و ایرانین بعضی بؤیوک شهرلریندن کولکسییالاری اوچون سخاوتلی تکلیفلر آلدیغینی بیلدیرهن تبریزلی کولکسیونئر بو گونه قدر تکلیفلری قبول ائتمکدن ایمتینا ائتدیینی دئییر. سارابی اقدم تکلیفلری رد ائتمهسینین سببینین آذربایجانی سئودیی اولدوغونو بیلدیریر.
هیکلتراش، یازیچی و آراشدیرماچی عالیم اولان کولکسیونئر رضا سرابی اقدم ایولون ۲-ده ساخلانیلاراق حبس ائدیلمیشدی. تانینمیش مدنی فعال ایواز تاها، مسئوللارین رضا سرابی اقدمین توپلادیغی اثرلرین تبریز پئشه موزئیینه آپاردیقدان سونرا قارشیلیغیندا مالییه وعدلرینه عمل ائتمدیکلری نتیجهسینده کولکسیونئرین پول پروبلمی ایله اوزلشهرک حبس ائدیلدیینی آچیقلامیشدی.
هئچ کیم بو اثرلرین دیرینی بیلمیر، چونکی تاریخ حاقیندا معلوماتلاری یوخدور و دیر وئرمیرلر.
عادتا صنعتچی قارداشی یقوبلا بیرلیکده ایشلهیهن رضا سرابی اقدم ‘تبریز من’ سایتیندا مصاحیبهده ایندی بو قیمتلی میراثا باخمایاراق، هئچ بیر مادی ایمکانینین اولمادیغینی قید ائدیب.
سارابی اقدم تاریخی اشیا و سندلری توپلاماق اوچون مادی ایمکانلارینی خرجلهییب و اؤمرونو بو یولدا صرف ائدیب آنجاق ایندی او، مادی احتیاجلارینی اؤدمکده چتینلیک چکیر.
توماس ادیسونون ال ایشیغی لامپاسی، یاخین شرقده برابری اولمایان فنر کولکسییاسی، تیموریلر دؤورونه عایید وران کیتابی، تورکمنچای مقاویلهسیندن سونرا قاجار و چار سرحدلرینین خریطهسی، ناسیست دؤورونه عایید آلمانییا سفیرلییندن آلینان اشیالار و موختلیف تاریخی دؤورلرین سلاحلاری کیمی اثرلر تبریزلی تاریخ ماراقلیسی کولتور خادیمینین کولکسییاسینی تشکیل ائدیر.
تبریز پئشه موزئیی حاقیندا کولکسییاچی بو موزئیین اؤز شخصی کولکسییا آوادانلیقلاری ایله قورولدوغونو و تجهیز اولوندوغونو دئییر. لاکین بلدییهنین لاقیدلیگی سببیندن نه موزئیین ایداره ائتمه وظیفهسی اونا وئریلیر نه ده مقاویلهیه گؤره اثرلرین پولو اؤدنیلیب.
کولکسیونئر علاوه ائدیب کی، مادی پروبلمینی حل ائتمک اوچون پئشه موزئیی مقاویلهسیندن بلدییهدن آلاجاغی پول چوخ اؤنملی ایدی آنجاق مسئول شخصلرین وئردیی وعدلری یئرینه یئتیرمهمهسی اونو پروبلمله اوزلشدیریب.
نیه تبریز بلیدیهسینین کولتور بودجهسی تبریزین تاریخی میراثینی قوروماق اوچون خرجلنمیر؟
"آنجاق یورولدوم. هئچ کیم بو اثرلرین دیرینی بیلمیر، چونکی تاریخ حاقیندا معلوماتلاری یوخدور و دیر وئرمیرلر. بو اثرلر و اشیالار اؤز لاییقلی یئرینه قویولدوغو تقدیرده تبریزه و اؤلکهیه نه قدر بؤیوک ثروت گتیره بیلجیینی بیلمیرلر. بو گئدیشات داوام ائدرسه، بلکه مهاجیرت ائدرهم،" تبریزلی کولکسییاچی ایفاده ائدیب.
تاریخ
2019.09.13 / 17:15
|
مولف
Axar.az
|