آذربایجانین گؤرکه‌م‌لی شاعرلرین‌دن اولان خالق شاعری بالاش آزروغلو گؤزل لیریک شعیرلرین، بنزرسیز پوئمالارین مؤلفی‌دیر. «سینه‌م ساوالان داغی‌دیر»، - دئیه‌ن بالاش آذروغلونون یارادیجیلیغین‌دا جنوب آغریسی، وطن حسرتی دایم اوخوجولارا دا سیرایت ائدیب، اونلاری دوشوندوروب.

آخار. آذ خبر وئریر کی، بو گون آذربایجان پوئزییاسینین اینکیشافین‌دا اؤزونمخصوص رولو اولان بالاش آذروغلونون آنادان اولماسین‌دان ۹۸ ایل اؤتور.

بالاش آذروغلو ۱۹۲۱-جی ایل نویابرین ۱۱-ده باکی‌دا دوغولوب. اورتا تحصیلینی ده بورادا آلیب. مکتب‌ده اوخویارکه‌ن ادبیاتا بؤیوک هوس گؤستریب. مکتبین ادبیات معلمی جعفر رمزی بو ساحه‌ده اونا بؤیوک تأثیر گؤستریب، قلبین‌ده ادبیاتا بؤیوک سئوگینی آلوولاندیریب.

اؤلمز شعیرلری ایله میلیونلارلا اینسانین بدیعی ذوقونو اوخشایان، ابدی رغبتینی قازانان، اورکلرده بوتؤو آذربایجانین محتشهم هیکلینی اوجالدان صنعتکار معنالی و شرف‌لی حیات یولو کئچیب. او، دوغولدوغو باکینی، بؤیودویو اردبیلی سئویب، ائرکه‌ن یاشلارین‌دان شعیره کؤنول وئریب. حیاتی موختلیف دولانباجلاردان کئچسه ده، اؤزونو، یوردون گؤزللیکلرین‌دن ایلهام‌لانان شاعر منینی و ایمضاسینی تانی‌دا بیلیب.
بالاش آذروغلونون یارادیجی‌لیغینا نظر یئتیرنده اونون جنوب ادبی موحیطینین منظره‌سینی یارادان اثرلرینی خصوصی قید ائتمک لازیم گلیر. شاعر ادبیاتیمیزین بو جغرافی مکانینا یئنی‌لیکلر گتیره‌ن، فورما آختاریشلاری و مؤوضوعلاری ایله سئچیله‌ن مؤلف کیمی یوکسکده دایانیر.

بالاش آزروغلو گنجلیین‌ده اؤزو کیمی اودلو-آلوولو شاعر قیزی سئویب. اؤزلرینه مخصوص آیری-آیری یارادیجی‌لیق اوصلوبلاری اولسا دا، مقصدلری بیردیر. بو قوشا سئوگی‌لیلرین اوریی آنجاق وطن عشقی ایله دؤیونوب. خالق شاعرلری مدینه گولگون و بالاش آزروغ‌لو اوزون ایللر صنعت یوللارین‌دا بیرگه آددیملاییب، ادبیات‌دا و عائله‌ده بیر اوجاغین ایستی‌سینه قیزینیب، ایستی سؤزلری ایله اورکلرده تونقال قالاماغی باجاریب، اؤولادلار بؤیودوب، کیتابلار یازیبلار.

شاعر اردبیل‌ده، تبریزده، باکی‌دا رهبر وظیفه‌لرده چالیشارکه‌ن، همیشه دوغما دیلینه و خالقینا صادق اولوب.

فارسجادان دیلیمیزه چئویردیی نیزامینین «یئددی گؤزل» پوئماسی، فضولینین غزللری، شهریاردان ترجمه‌لری گئنیش اوخوجو کوتله‌سی طرفین‌دن رغبتله قارشیلانیب. شاعرین موختلیف ایللرده «شعیرلر»، «ساوالان»، «مباریزه یوللارین‌دا»، «گنج‌لیک دوستلاریم»، «منیم نغمه‌لریم»، «سحر شفقلری»، «صنعتین قدرتی»، «حافیظین قبری اوستون‌ده»، «ائله اوغول ایستییر وطن»، «دونه‌نیم، بو گونوم، صاباحیم»، «گل، آی بهار»، «سینه‌م ساوالان داغی‌دیر»، «بیر کورسو ایستییرم» و دیگر کیتابلاری اونا اوخوجو رغبتی قازاندیریب.

۲۰۱۱-جی آپرئلین ۲۴-ده وفات ائد‌ن بالاش آزروغلو باکی‌دا دفن اولونوب.