بئش ایل اؤنجه موغاندان اسلامشهره داشیندیق. آتام گژخاج ایشینده اولار. بیر گون موغاندا ائویمیزده آناملا دانیشارکن دویدوم. او زامانلار من هله سککیز یاشیندا ایدیم. آتام دئییردی ایشلر بوردا یاخشی دئییل. مشه جبرائییل ایله دانیشدیم. او دئدی چیخ گل تهرانا. تهراندا هم یایدا هم ده قیشدا ایش واردیر. بیرده بوردان چوخ پول وئریرلر.

تهران، منیم اوچون هر زامان خیالیمدا و فیلملرده بیر شهر اولموشدور. آخی هئچ بیر فیلیم بیزیم موغاندا چکیلمیردی. فیلملرده اوینایان اوشاقلاری هر زامان قیسقاناردیم. او گونلر آتامین بو فیکرینه چوخ سئویندیم. صاباحی اوخولدا یولداشلاریما هاوا آتاراق دئدیم بیز ده تهرانا گئدیریک. اونلار دا منی قیسقانمایا باشلادیلار. دوستلاریم گؤیلوما دوشه جکدی آما تهراندا یاشاماغی و او فیلملرین چکیلدیگی یئرلری گؤرمه یی چوخ ایستیردیم.

تهرانا داشیندیقدان سونرا بیر نئچه آی منیم اوچون چوخ چتین ایدی. کوچه ده هئچ کیم تورکو دانیشمیردی. اوشاقلارین اویونلاری منیم دوستلاریم ایله فرقلی ایدی. آتام هر گون ایشه گئدیردی. سحر تئزدن ائودن چیخیردی گئجه ده یورغون آرغین گلیب بیر تیکه شام یئییب سونرا دا یاتیردی. گؤزلریندن یورغونلوق یاغیردی. آنام ایسه هر گون موغانداکی ننه م و خالالاریم ایله ساعاتلارجا تئلفوندا دانیشیردی.

اوگون سحر آتام صبحانه یئرکن اخبارا قولاق آسیب یئنه اؤز اؤزونه دانیشیردی؛ نه یاخشی ماشینیمیز یوخدو. یوخسا بو باهالاشما ایله بنزین آلانمازدیق. بنزین باهالاشدی هر زاد باهالاشاجاق. من ده ایشلریمی باهالاشدیرماق ایستیرم. آما قورخورام بو باهالیق و قیشین گلمه سی ایله ایشلر اؤنجه کی کیمی اولماسین.

اوخولدان دؤنرکن غیر عادی بیر وضعیت وار ایدی محله میزده. بیر چوخ پلیس ماشینی و موتورچولار دولانیردی. ناهاردان سونرا آنام منی سوت آلماق اوچون باققالا گؤندردی. باققال بیزیم محلله نین باشیندا بؤیوک خیاباندا ایدی. اوینایا اوینایا خیابانا ساری گئدیردیم. خیابانا چیخاندا اورتالیغین قاریشیق اولدوغون گؤردوم. فیکر ائله دیم فیلم اوینورلار. اینسانلار شعار وئریردی.

پلیس لر ووردو. هیجانلاندیم. گولله سسلری ده گلیردی. هر کس بیر طرفه قاچیردی. بیردن سینه مده بیر آغری حیس ائله دیم، الیمی آتدیم سینه مه و الیم قان ایله دولو اولدو.

ایچیمده بیر سس باغیردی: آتا منی ووردولار.

اوچ گون قارانلیق و سویوق بیر یئرده ساخلاندی جانسیز بدنیم. سونرا آتا و آنامین گؤز یاشلاری ایچینده منی دوغولدوغوم شهر موغانا آپاردیلار. و سونسوز یوخویا یاتدیم دوغما وطنیمده.