آنا صحیفه کولت |
تورکجهیه چئویردی: سوسننوادهرضی
«طوفانلاردا سینان سرو آغاجی، ایچیندن چوروموش اولور...»
حسن بیزوو
هئچ کیمسه اونون کیمی یالقیز دئییلدی. هئچ کیمسه اونون قدر یوخسول-کیمسهسیز دئییلدی. آنجاق هئچ کیمسه، اونون کیمی اومودلو و گولراوزلو ده دئییلدی.
دونیانین وار دؤولتیندن بیر تک شئیی وار ایدی: اومود!
"بایرامدان سونرا ایشلر هامیسی دوزهلهجک"-دئییردی هر زامان. اوزون ایللر بویو بونونلا اورهیی خوش ایدی. نوروز بایرامی یئتیشسین دئیه، گونلری سایاردی. ایستردی قیش گئدیب جهنم اولسون، باهار گلسین، گونش گولر اوزلو ، الیآچیقجاسینا ایشیغینی، ایستیسینی جماعته یاغدیرسین. او دا، سئوینجله، اشتیاقلا بونون- اونون ائوینده ایشلهسین. فرش یوسون، خالچا یوسون. بئش- اون شاهی چیخاردیب باشدان- باشا ایش و امک دولو صاف ساده یاشامینا داوام ائتسین.
آدی حوسئن ایدی، آما محلله اوشاقلاری "حوسئن بیزوو" سسلهردیلر بیلهسینی. معلوم دئییلدی هانسی حلال سود اممیش بو آدی سئچمکده ذؤوق و سلیقه قوللانمیشدی، چونکی بو آد اولدوقجا آنلاملی ایدی. اونون هم سیر- صیفتی هم ده بوی-بوخونو دوغوردان دا ائله "بیزوو"-ا بنزهییردی. گؤده بوینو، تناسوبلو آما کؤک اندامی واردی. کوفته بورون، لاپبا دوداق ایدی، قاپقارا ایری گؤزلری ده اولدوقجا چکیجی ایدی. او همیشه گولردی. اوست دوداغینین سول طرفینده بیر اَیریلیک واریدی، اونا گؤره ده دانیشاندا هامی دئیردی بس کی او گولور. لاپ اورهیی توتولوب آغلاماق ایستهدییی زامان بیله، هامییا ائله گلردی کی، حوسئن بیزوو گولور.
بعضن محلله اوشاقلاری اونونلا باشباشا قویار، دئییب گولوب شوخلوق اوچون اونون باش- قولاغینا دیرماشار اونو یومروقلاردیلار. او اینجییهردی، آما اینجیمهیین اونون اوزونده یانسیماسی ائله بیر تهر ایدی کی،گینه ده گولمهیه بنزیردی. بونا گوره ده اوشاقلار شیرنیشیب داها چوخ کؤتکلردیلر بیلهسینی.
اوشاقلار دئیردیلر بس حوسئن بیزوو کؤتکلنمکدن خوشو گلیر. بلکه ده ائله خوشو گلردی. چونکی هئچ اعتیراض ائتمزدی. چوخ واخت، یاشیدی اولان بیر نئچه اوشاقایله البهیخه اولاردی، اونلار دا بونون تپهسینه کؤرهیینه دیرماشاردیلار. تاپدالاییب گولوشردیلر. او هئچ آلدیرمازدی. حتتا عوض آچماق ایستهسهیدی بیله، اوشاقلاری، اینجیمهسینلر دئیه، یاووهجه دؤیهردی.
او، بوتون اوشاقلاردان داها گوجلو، داها بوینو یوغون ایدی. ائنلی کورکلی، زیرپی انداملی بیری ایدی. بیر نئچه اوشاقلا عینی زاماندا دوستیانا گولهشیب شوخلوقجا دؤیوشه بیلیب هامیسینا دا دوو گله بیلدییندن رضایتلیق دویوردو، لذت آلیر خوشلانیردی. سانکی بو تهر گولهشیب سئوینجلی وور ها وورلار اونون جانینی قیزدیریر، کئفینی سازالدیردی. بو اونون اوچون بیر دورلو ایلهنجه، ورزش و اویون ایدی. او بئله دوشونوردو کی، یاشاماق ائله بوندان عیبارتدیر کی، سحردن آخشاما اونون – بونون ائوینده زحمت چکیب ایشلهسین، آخشاملار دا گلیب گوذرده محلله اوشاقلاری ایله دالاشیب گولهشسین. ظارافاتلاشسین، گولسون، گئجه ده یورغون- آرغین گئتسین "تورپلار" (تورپلار بیر کند آدی دیر تبریزین اطرافیندا، بو کندین اهالیسی تبریزه گلندن بو کروانسارادا اوتراق ائدرمیشلر) کروانساراسینین دیب صاندیخاناسیندا، تک تنها، گئجهنی سحرلهسین.
او بئله دوشونوردو کی، یاشامین- ان آزی اونون یاشامینین- گؤزللییی ده ائله بو ایشلمکلرده، ظارافاتلاشیب میرتداشیب گولوشمکلرده دیر.
شوخلوقلار و باشباشا قویمالار اونون یاشاییشینین بیر پارچاسی و بلکه ده ائله بوتونو ایدی. هر کیم اونا یئتیشردی، دئیهسن اونونلا میرتداشمادان، اونا دولاشمادان ایشینه گئدهنمیردی.
محرملییین عزادارلیقلاریندا، "شاخسئی واخسئی" دستهلری یولا دوشدویونده، "قوز سولئیمان" شاخسئی آغاجی الینده دستهباشی اولوب "شاه حسئن" دئیه باغیراندا، حوسئن بیزوو، هامیدان قاباق گلیب عزادارلار صفینین باشیندا دورار "وای حسین" دئیهردی. آنجاق "قوز سولئیمان"-ین گؤزو اونا دوشجک اونو دستهدن ائشییه سالیب دئیردی:
-چیخ ائشییه حوسئن بیزوو! سن عزادارلار دستهسینی قاتیشدیریرسان. بورا عزادارلیق یئریدیر، میرتی- گجهله یئری دئییل!
داوامی وار...
تاریخ
2020.03.30 / 20:25
|
مولف
سعید منیری
|