آنا صحیفه کولت |
کؤچورن: شبنم توحیدی
قاشقایی تورکلرینین تویلاری (دویونلری) اسکیدن بَـری بؤیوک، قالابالیق و گؤرکملی اولار. قوناقلارین چوخ اولماسی نهدنی ایله بؤیوک قازانلار آسیلیب، چوخلوجا یئمک پیشیریلیر. توی یئمهیینده پیلوو و اَت اولمازسا اولمازدیر.
گئچمیشده دویولر آغارمامیش و کَــپکلی اولدوقلاری اوچون قوللانمادان اؤنجه دؤیولمهلیدیرلر. اونجا قوناغین دویوسونو آغاردیب حاضیرلاماق چتین و زامان آلان بیر ایش اولدوغو اوچون تویدان بیر-ایکی هفته ایرهلی دویو دؤیولورموش. بو ایش اوچون اوغلان اوباسینین قیزلاری و خاتینلاری توپلانیب آساناکلار ییرلایاراق بو ایشی گؤررمیشلر. بو خاتینلارا "ایمَــجی" دئیرلر.
قاشقایی خاتینلاری زامان ایچینده بو ایشی بیر تؤرهنه چئویرمیشلر.
دویونو دیـبهیه (هَــوَنگــه) تؤکوب، دسته ایله دؤیرلر، دستهلرین باشینا رنگلی یایلیقلار (دسماللار / مَــندیللر) دویونلرلر. رنگلی یایلیقلار شادلیق سیمگهسیدیر.
ایکی خاتین قارشی-قارشییا دوروب، دویو دؤیــر. ایشین چتینلییی و یورقونلوغوندان داها آز ائتکیلنمک اوچون خاتینلار بیر-بیرینین قارشیسیندا دوروب، بو تؤرهنه اؤزل "هاینا هَــلئی هاینا" آدلی قوشقونو سس-سسه قوشوب، اوخویارلار، آغاجلارین دیبـهیه دهیمهسی و قوشقونون ریتمی ایله بیرلیکده گؤزل بیر اورتام یارانیر.
او اؤزل قوشقو بئله اوخونور:
هایــنا هایــنا هـــاینا
هومـمـه هَــلئی هــاینا
سیز ده دئیینگ هــاینا
بیز ده دئرَگ هـــاینا
واری دئیینگ هـــاینا
اوتایـدا یار اوبـاسی
دؤیولور نــاغاراسی
بوغچـا گتیر گـول آپار
خلوتدیر باغ آراسی
هایــنا هایــنا هـــاینا
سیز ده دئیینگ هــاینا
سیز ده دئیینگ هــاینا
بیز ده دئرَگ هـــاینا
واری دئیینگ هـــاینا
کَــهَـر آتینگ قولونو
مَـخمل ائدینگ چولونو
بیز گلمیشیک آپاراگ
سیزینـگ باغینـگ گولونو
اولگَــرم آیـا بَنـــدم
چئشمهیم چـایا بَنـــدم
اوزونــگ دؤندر بیر اؤپــم
حسرتلی وایامَــندم
هــاینا هـــاینالی قیزلار
جئــبی آینـالی قیزلار
آینایی وئر من باخـام
قشنگ دئمهلی قیزلار
آیآیدیندیر، آی باتماز
ایتلر دولانیر یاتماز
شاهــمار چالسین آنانگـی
کی سندن آیری یاتماز
داغدان ائندیردیم قــاری
مَــجمهیه دوزدوم نــاری
بَـزهتدیم یولا سالدیم
نــازلی غمزهلی یــاری.
تاریخ
2020.07.07 / 23:57
|
مولف
دیعه پارلار
|