آذربایجان ملّی حرکتی، نئچه مدت دیر بیه‌نیلمز بیر ادبیات طرفیندن، هجوم آلتینا آلینیب.

بو لمپن ادبیاتی، حرکت ایچینه سوخولماقلا، اؤزونو میلی حرکتین سابیقه‌لی بیر پارچاسی کیمی تانیتماغا جان آتیر.

اما بو چیرکین ادبیات چوخ مدت گوجنمه‌یینه راغما، باجاریقلی اولمادیغینا هامیمیز شاهیدیک.

بو لمپن ادبیاتین آرخاسیندا ضید تورک پان فارسلارین ایپ اوجلارین گورمک، او قدر ده چتین دئییل.

آذربایجانین ملّی روحو، اوزون مدت تدبیرلری سایه‌سینده، ملّی حرکتین فعالیت مئیدانلارین، دانیشگاه دیوارلاری آرخاسیندان، بابک قالاسی‌نین زیروه‌سیندن، کندلر ایله شهر حاشیه‌لری‌نین کوچه‌لریندن، شهرلرین اورتاسینا دک گئنیشلندیرمه‌یه ایمکان تاپیب.

بوگون آذربایجان شهرلری‌نین متنینده یاشایان، اجتماعی لایه‌لر ایسه بوتون طبقه‌لرینده، ملّی حرکته قوشولماق اوچون جیدی ماراق گؤرونور. یعنی آذربایجان ملّی حرکتی شهرلرین بوتون جمعیتی لایه‌لرینده ملّی روحوموزا فعالیت مئیدانلاری آچا بیلیب.همین بو مئیدانلارین آچیلماسی، پانفارسلاری میلی حرکتین اوستونه قیشقیردیب تحریک ائدیب.

بیلدیگینیز کیمی، شهر متن‌لرینده کئچیرلن یاشام طرزی، کندلر ایله حاشیه‌لرده کئچیریلن یاشام طرزی ایله تماما فرقلی دیر. بو فرق‌لره أساسا، آذربایجان ملی روحو، ذاتینداکی مدنیت ایله اخلاق سویه‌لرین، داها آرتیق سرگیله‌مه‌لی‌ دیر.‌ جامعه‌نین اورتا و یوخاری لایه لری، بئله بیر سرگی‌نین چکیجی و توتوم‌لو اولماسیلا، ملی حرکته گۆوه‌نیب، اونون آچدیغی مئیدانلارا داخیل اولارلار.

چرکین ادبیات لا اخلاقسیزلیقلار، بو لایه لری میلی حرکتدن اۆورکوتمک اوچون حرکتده یایدیریلیر.

(( بو سایاق سالدیرمالار لا، محروم طبقه‌لر مباریزه آپارماغی باجارا بیلسه‌لر ده، اورتا و یوخاری طبقه، باجارا بیلمز. بونا گؤره ده بو سایاق فعالیت مئیدانلارا گیریب فعالیت ائتمکدن چکینرلر و یا ماراقلانمازلار.)) خالقینی مدنیتینی سئون ملّی حرکتین دوغرو فعال‌لاری فعالیت فضالارینی، محیط‌لرینی، بئله بیر چرکین ادبیات لا چیرکینلشدیرمزلر. یالنیز اوغرولار اؤزلرین دوغرو گؤسترمک اوچون بو ادبیات‌دان فایدالانماق ایسترلر. پانفارس‌لار دا اوغرولارین بو ضعفین تقویت ائتمک له ملّی حرکتین بۆتؤوون اخلاقسیزلیقلارلا بولاشدیرماغا تاماح سالیبلار.

امینم آزربایجانین ملّی روحو،‌ دوغرو فعاللارینین زحمت‌لری واسطه‌سی له مدنی و اخلاقی ادبیات لا، شهر متن لرین داها آرتیق میلی حرکته ماراقلاندیراجاق.

شهرین متنی اؤزونه عایید مئیدانلاردا حرکتین چوخ چتین دۆیون‌لرین آچماغا قادیردی.