اردبیل ایالتین‌ده‌کی عنبران شهر شوراسی عضولری هامیلیقلا ایستعفا ائدیبلر.

آذنیوز. تی وی خبر وئریر کی، عنبران شهر شوراسینین عضولری نامین فارماندارینا گؤندریله‌ن مکتوب‌دا هامی‌لیقلا ایستعفا ائتدیکلرینی آچیقلاییبلار.

انبران شهر شوراسینین عضولری ایچمه‌لی سویون وضعیتینه سرت اعتراض اولاراق هامی‌سی بیرلیکده ایستعفا ائتمکله اعتراضلارینی بیلدیریبلر.

«ایچمه‌لی سو حاقین‌دا مسئوللارلا یوزلرله ایجلاسین ثمره‌سیز اولدوغونو، هابئله، شهرده شورایا قارشی میللتین اعتراضلارین آرتماسین‌دان دولایی بیرلشه‌رک ایستعفا ائدیب اعتراض سسیمیزی دویورماق ایستدیک»، – دئیه‌ن عنبران شهر شوراسی عضولری ایستعفا مکتوبوندا ایچمه‌لی سویون اولماماسی سببی ایله شهرین اوچده ایکی حیصه‌سینین کؤچ ائتمه‌سیندن بحث ائدیبلر.

«تأسف کی، اراضی‌ده‌کی ایچمه‌لی سو پروبلمینی حل ائتمک اوچون مأمورلارلا چوخسایلی گؤروشلر نتیجه‌سیز قالدی. شهر شوراسی مجلیسینه گیرمک‌ده ایچدییمیز آندی نظره آلاراق اعتراض علامتی کیمی ایستعفا وئرمکدن باشقا چاره‌میز اولمادی»، – عنبران بلدییه‌سینین سؤزچوسو یوسیف شفیقی مصاحیبه‌سین‌ده دئییب.