بیر قروپ میللت وکیلی ایران مجلیسینین رئیسی علی لاریجانییه اعتراض ائد‌رک بنزینین قیمتینین باهالاشماسین‌دان نماینده‌لرین خبرینین اولمادیغینی بیلدیریبلر.

مجلیس نماینده‌لری بوگونکو ایجلاس‌دا بنزینین قیمتینین باهالاشماسین‌دان سونرا باشقا ماللارین قیمتینه نظارت ائدیلمه‌سینه چاغیریب.

«گؤزلنتیمیز اودور کی، اینسانلارین اقتصادی تضییق‌ده اولدوغو نظره آلین‌سین و بئنزینین باهالاشماسی حاق‌دا قانون یاخشی نظارتله ایجرا ائدیل‌سین. ائل‌جه ده آیری ماللارین قیمتینه تأثیر ائتمه‌سین»، – مجلیس نماینده‌سی محمدرضا صباغییان دئییب.

عینی زامان‌دا دیگر میللت وکیلی غلامرضا کاتیب لاریجانییه دئییب:

«جناب لاریجانی، سیزدن گؤزلنتیمیز اودور کی، مجلیس طرفین‌دن ایشتیراک ائتدیینیز ایجلاسلاردا نماینده‌لرین فیکیرلری ده نظره آلینسین. هابئله، دؤولته قیمتلره نظارت ائتمه‌سی اوچون لازیمی خبردارلیق ائتمک لازیمدیر کی، اهالی معیشت و اقتصادی جهت‌دن داها آز ضرر گؤرسون».

باشقا میللت وکیلی احد آزادیخواه دا مسئله‌یه مناسبت بیلدیریب:

«آلتینجی اینکیشاف پلانینا اساساً، انرژی داشیییجیلارینین قیمتینین باهالاشماسی مجلیس‌ده تصدیق ائدیلمه‌لی‌دیر. اما تأسف کی، میللت وکیللرینین بنزینین باهالاشماسین‌دان خبرلری اولماییب و بیز بونا اعتراض ائدیریک».

خاطیرلاداق کی، اؤلکه‌ده بنزینین قیمتینین اوچ دفعه باهالاشماسی اهالینین اعتراضلارینا سبب اولوب کی، بو اعتراضلار نتیجه‌سین‌ده نئچه نفر حیاتینی ایتیریب.