روسییا پرزیدنتی ولادیمیر پوتین اوکتیابرین ۱-ی، چرشنبه آخشامی گونو خزر دنیزینین حقوقی کونونسییاسینی ایمضالاییب و بئله‌لیکله کونونسییا قانون ایستاتوسو آلیب.

روسییا پارلامنتی سنتیابرین ۱۹-دا کونونسییانی تصدیقله‌ییب.

قید ائدک کی، اؤتن ایلین آوقوست آیین‌دا ایران، آذربایجان، روسییا، قازاخیستان و تورکمنیستان دا داخیل اولماقلا خزر دنیزی اؤلکه‌لرینین رهبرلری خزرین یئنی حقوقی کونونسییاسینی ایمضالاییب و بو اؤلکه‌لرین پارلامنتلری طرفین‌دن راتیفیکاسییا ائدیله‌رک حقوقی و قانونی قوه‌یه مینمه‌سی گؤزلنیلیر.

ایران‌دان باشقا دؤرد خزریانی دؤولتین پارلامنتلری کونونسییانی راتیفیکاسییا ائدیب.

یئنی کونونسییا اؤلکه‌لرین سو و دنیزآلتی سرحدلرینی معین ائتمه‌سه ده، ساحلیانی دؤولتلره اؤز سرحدلرینی معینلشدیرمک اوچون ایکیطرف‌لی راضی‌لیق الده ائتمه‌یه ایمکان وئریر.

روسییا، آذربایجان و قازاخیستان داها اؤنجه ایکیطرف‌لی سازیشلر چرچیوه‌سین‌ده دنیزین دیبی اوزره اؤز سرحدلرینی معینلشدیریبلر، لاکین بو مسئله تورکمنیستان و ایران طرفین‌دن قبول ائدیلمه‌یه‌رک ایسته‌نیله‌ن سازیشی بئش طرفلی رازضیلاشمانین الده ائدیلمه‌سیله شرتلندیریب.

حاضردا آذربایجان، روسییا و قازاخیستان خزر دنیزینین شیمال حیصه‌سین‌ده یالنیز دنیزین دیبینی بؤلوشوب و اونلارین سو سطحینین حدودلاری هله‌لیک معین ائدیلمه‌ییب.