خارج‌ده یاشایان بیر گروپ ایرانلی سیاسی مهاجر اؤلکه‌ده یاشایان خالقلارین نماینده‌لرینین اشتراکی ایله "ایران خالقلارینین دموکراتیک پارتییاسی"نین یارادیلماسی اوچون تشببوس گروپو فورمالاشدیریبلار.

Axar.az خبر وئریر کی، بو حاق‌دا تشببوس گروپونون آلمانیاداکی تمثیلچی‌سی معلومات وئریب.

"ایران‌دا اسلام رسپوبلیکاسی دیکتاتوراسینین مقصدلی و آیری-سئچکی‌لیک سیاستینین نتیجه‌سی اولاراق اؤلکه‌ده یاشایان مختلف خالقلار آراسین‌دا باغلار ضعیفله‌ییب. بو، خالقلارین و سیاسی گروپلارین بیر-بیریندن تجرید اولونموش وضعیتده قالماسینا، گوجلرینین بؤلونمه‌سینه و مرکزی حاکمیتین دیکتاتوراسینی داوام ائتدیرمه‌سینه مونبیت شرایط یارادیب. بونو آرادان قالدیرماق، حقوقلاری پوزولان خالقلارین گوجونو واحد هدفه یؤنله‌ندیرمک اوچون یئنی قورومون یارادیلماسی تاریخی ضرورت کیمی اورتایا چیخیب"،- معلومات‌دا بیلدیریلیب.

تشببوس گروپونون آلمانیا تمثیلچیلیینین سؤزلرینه گؤره، تورک، بلوچ، فارس، کورد، عرب، لر و باشقا خالقلارین اونلارلا نماینده‌سینین بیر نئچه آی داوام ائد‌ن دانیشیقلاریندان سونرا یئنی قورومون یارادیلماسی اوچون عملی آددیملار آتیلماسی باره‌ده راضیلیغا گلینیب.

بعضی سیاسی ملاحظه‌لر و تهلوکه‌سیزلیک مسئله‌لرینه گؤره هله‌لیک آدینین آچیقلانماسینی ایسته‌مه‌یه‌ن تشببوس گروپونون عضوو، مشهور دیسیدنت علاوه ائدیب کی، دموکراتیک پرینسیپلری و دینج سیاسی مبارزه‌نی اساس گؤتورن یئنی قوروم "ملی مقاومت شوراسی" و رضا پهلوینین تمثیل ائتدیی مونارخییا طرفدارلارینا دا بونونلا باغلی مکتوب گؤندریب:

"پهلوینین باشچی‌لیق ائتدیی جریان ایران‌دا یاشایان خالقلارین "اؤز مقدراتینی تعیین ائتمه پرینسیپی"نه شبهه ایله یاناشدیغی اوچون مکتوبا هله‌لیک قطعی جواب وئرمکدن امتنا ائدیب، بونون اوچون واخت ایسته‌ییب. "ملی مقاومت شوراسی"نین نماینده‌سی ایسه حاکم دیکتاتورایا قارشی بیرمعنالی مؤقعی اولان بوتون قوروملارلا امکداشلیق ائتمه‌یه حاضر اولدوغونو بیلدیرسه ده، قطعی جوابین یاخین گله‌جکده شورانین رهبرلیی سوییه‌سینده مذاکره اولوندوقدان سونرا وئریلجیینی بیلدیریب".

تشببوس گروپونون تمثیلچی‌سینین دئدیینه گؤره، ایرانین کئچمیش شاهی، محمدرضا پهلوینین حیات یولداشی و رضا پهلوینین آناسی فرح دیبانین دا (پهلوی) اوفیسینه مکتوب گؤندریلیب:

"فرح خانیم تشببوسو مثبت قارشیلاییب، خیر-دعا وئرسه ده، سیاسی مسئله‌لرله بیر باشا مشغول اولمادیغینا گؤره اوغلو رضا پهلوینین جوابینی گؤزله‌مه‌یی مصلحت بیلیب".

بونونلا یاناشی قید اولونوب کی، ایران‌دا یاشایان خالقلارین فعال تشکیلات و پارتییالارینا دا مکتوبلار گؤندریلیب، اونلارین اؤز پرینسیپلری و طلبلرینی ساخلاماق شرطیله یئنی قوروم‌دا تمثیل اولمالاری ایسته‌نیلیب.

تشببوس گروپونون نماینده‌سی یئنی قوروم‌دا تمثیل اولونماغین اساس شرطینین "ایران‌دا یاشایان خالقلارین اؤز مقدراتینی تعیین ائتمک پرینسیپینه حرمتله یاناشماق" و "یالنیز سیاسی و مدنی مبارزه‌نین اساس گؤتورولمه‌سینی قبول ائتمک" اولدوغونو وورغولاییب:

"بو گونه کیمی الده اولونان تجربه، بؤلگه و دنیادا باش وئرن پروسسلر دینج سیاسی و مدنی مبارزه‌نین داها مقبول و مثبت اولدوغو باره‌ده فکرلرین حاقلی، منتقلی و تأثیرلی اولدوغونو ثبوت ائدیر. ایران‌دا یاشایان خالقلارین طالعیی باشقا دولتلرین و گوجلرین اراده‌سی اساسین‌دا حل اولونمامالی، اونلارین منافعیی اوغرون‌دا ماسایا قویولمامالیدیر!".

تشببوس گوروپون‌دا هله‌لیک ۱۰۰ یاخین سیاسی فعال، ضیالی، یازیچی و مدیا منصوبونون تمثیل اولوندوغو، بیر او قدر شخصین ده قوشولماق مراجعتینه رد جوابی وئریلدیی دقته چاتدیریلیب.

تشببوس گروپونون نماینده‌سی یاخین گله‌جکده یئنی قوروملا باغلی مدیایا داها گئنیش معلومات و مصاحبه وئریلجیینی سؤیله‌ییب، خارج‌ده فعالیت گؤسترن بعضی مدیا قوروملارینین مسئله‌یه قیسقانج‌لیقلا یاناشدیقلاری اوچون اونو ایشیقلاندیرماقدان امتنا ائتدیکلرینی دئییب:

"تأسفله "خالقلارین اؤز مقدراتینی تعیین ائتمک پرینسیپی"نه اؤزونو "آزاد" و "دموکراتیک" آدلاندیران بیر سیرا قوروملار و مدیا ارگانلاری دا شبهه و غرضله یاناشیر".

قید اولونوب کی، یئنی قورومون فورمالاشدیریلماسی استقامتینده ایشلرین داوامین‌دا ت.و کانالینین دا آچیلماسی اساس و ایلکین مقصدلردن بیری کیمی گوندمده‌دیر.