ایران اطراف محیط تشکیلاتینین رئیسی اعلان ائدیب کی، علمی آراشدیرمالار تورکییه‌نین شرقین‌ده یئرلشن وان گؤلوندن اورمو گؤلونه سو اینتیقال ائتمیین مومکون اولدوغونو گؤستریر.

آخار. آذ خبر وئریر کی، بو باره‌ده عیسی کلانتری آوقوستون ۱۳-ده کئچیریله‌ن مطبوعات کنفران‌سین‌دا و آنادولو خبر آگنتلیینه دانیشیب.

«بیزیم آراشدیرمالاریمیز و تورکییه طرفی ایله آپاردیغیمیز موذاکیره‌لر وان گؤلوندن اورمو گؤلونه سو اؤتورمیین مومکون اولدوغونو گؤستریر.

وان گؤلونون سویو اورمو گؤلونو قوروماق تهلوکه‌سین‌دن قورتارا بیلر. وان گؤلو، اورمو گؤلونه نیسبتا ۴۵۰ متر یوکسکلیکده یئرلشیر، ایکی گؤلون آراسین‌دا ساده‌جه ۲۶۵ کیلومتر مسافه وار.

حاضردا وان گؤلونده سویون سوییه‌سی آرتیب. گؤلون درین‌لیگی ۳۵۰ متردن چوخدور، بو وضعیت حتی گؤلون دیبین‌ده یاشایان جانلیلارین حیاتی اوچون تهلوکه یارادیر.»- دئیه او بیلدیریب.

آنکارا ایله موذاکیره‌لرین داوام ائتدیینی بیل‌دیره‌ن کلانتری وورغولاییب کی، بو زمین‌ده هله بیر نئچه علمی سوالا جواب وئریلمه‌لیدیر. دانیشیقلار یکونلاشدیقدان سونرا هر ایل ۱ میلیارددان ۲ میلیارد کوبمتره قدر سو اورمو گؤلونه اؤتوروله بیلر.