شرقی آذربایجان ایالتین‌ده باش وئره‌ن زلزله بؤلگه‌سین‌ده اهالینین اساس پروبلملرینین آرادان قالدیریلمادیغینا دایر هر گون یئنی ماتئریال یاییلیر.

آخار. آذ خبر وئریر کی، میانانین ورنکش کندی، خصوصی ایله ده زلزله‌ده هلاک اولان آزیاش‌لی زهرانین آتاسی ائوینی عکس ائتدیره‌ن ویدئو یاییلیب. چرشنبه گونو چکیله‌ن ویدئودا گؤرونور کی، حکومت رسمیلری یالنیز گؤرونتو اولاراق بؤلگه‌یه گئدیر و موختلیف وعدلر وئریرلر. لاکین اونلار وئردیکلری وعده عمل ائتمیر.

اؤلومون‌دن سونرا سوسیال شبکه‌لرده مشهورلاشان زهرانین آتاسی ائوین‌ده هله ده داغینتیلارین تمیزله‌نمه‌سی عملیاتی باشا چاتماییب.

زهرا عابدینین اوللر سهند کانالینین «کندیمیز» پروگرامینا دانیشدیغی سؤزلر اؤلوموندن سونرا وئریلیشین آپاریجی‌سی فردین آللاهیاری طرفین‌دن یاییلیب. اونون مکتبلرینده‌کی پروبلملری دیله گتیرمه‌سی و شیرین دانیشیغی ائشیدنلری چوخ کدرلندیریر.

آزیاشلینین آتاسی و هاجر میرزایی آدلی بیر خانیم زهرانین کندده طبی مرکز و داوا-درمانین اولمادیغین‌دان اؤلدویونو بیلدیریب. «قیزیم داغینتیلارین آلتین‌دان دیری چیخاریلدی. او خسته‌خانایا چاتدیریلدی، لاکین اوکسیژن بالونو و حکیم اولمادیغین‌دان حیاتینی ایتیردی.»- دئیه آزیاشلینین آتاسی بیلدیریب.

نویابرین ۱۳-ده زهرانین دونیایا گؤز آچدیغی ائوین قاپیسین‌دان باش ساغلیغی بانری آسیلیب. اردبیل‌دن اولان آذربایجان‌لی میللی-مدنی فعاللار طرفین‌دن حاضرلانان بانرده «آذربایجان باشین ساغولسون! یاسیمیزی اؤزوموز توتاریق» سؤزلری یازیلیب.