سون واختلار ایران حاکمیتینه یاخین جریانلار، هابئله بعضی مخالیف قروپلار تورک فعاللار و «تراختور» آزارکئشلرینه قارشی سرت اؤلچولر گؤتورولمه‌سینی طلب ائدیر. سیاسی تحلیل‌چی صادق عیسی‌بی‌لی دئییر کی، ایران دؤولتچیلیینی تمثیل ائد‌ن قروپلار «تورکلر و آذربایجانا قارشی آچیق تهدیده کئچیبلر و بونون سببلری وار.»

آخار. آذ خبر وئریر کی، عیسی‌بیلینین سؤیلدیکلرینه اساساً، ایران‌دا غیری-فارس ایجمالارین طلبلرینی یئرینه یئتیرمک ایسته‌مه‌یه‌ن ایران حاکمیتلرینین بو گونه قدر یوروتدویو «اینکار، تحقیر و تحریف» سیاستلری آرتیق فونکسییاسینی ایتیریب.

او حساب ائدیر کی، توپلومدا یارادیلمیش «حکومت تورکلرین الین‌ده‌دیر» پروپاقانداسینین دا آرتیق هئچ بیر ایناندیریجیلیغی قالماییب.

«تاریخ‌ده ایرانین اجتماعی-سیاسی حیاتین‌دا آذربایجانین و عمومیتله تورکلرین رولو بللی‌دیر هر کسه. تاریخ بویو موختلیف دؤنه‌ملرده تورکلرین حاکمیت‌ده اولماسی و سایر. اما بئله بیر تبلیغاتین آپاریلماسی کی، تورکلرین سیاسی-اجتماعی حیات‌دا و دؤولت ایداره‌سین‌ده نفوذو هله ده اولدوغو کیمی قالیر، بو آرتیق اؤز ماهیتینی ایتیرمیشدیر. بونون بئله اولمادیغی گون ایشیغی کیمی آیدین اولموشدور»، سیاسی فعال آچیقلاییر.

صادق عیسی‌بیلینین سؤزلرینه گؤره، «بو گون مدرن دؤولت سیستمینین قورولوشونا باخاندا، ناظیرلر، ایجرائدیجی، قانون وئریجی و محکمه قورومو و یا حربی ساحه‌ده سلاح‌لی قوه‌لرین ایچینده تورکلرین نفوذو ایله باغلی دوروم تمامیله دییشدیریلیب. تورکلری گئتدیکجه بو دؤولت قوروملاریندان آییریبلار.»

سیاسی شرحچینین فیکرینجه، گونئی آذربایجان‌دا واخت آشیری باش قالدیران کوتلوی اعتراضلار گؤستریر کی، تورکلر آرتیق ایران حاکمیتین‌ده رول صاحبی اولدوقلارینا دایر تبلیغاتا اینانمیرلار.