آساخبر: بیر یولوخوجو خسته‌لیک‌لر اوزمانی دئدی: ایلک باشدا کورونا علامت‌لری نفس تنگ‌لیق، قیزدیرما و اؤسکورمه‌یدی، آیندیسه ویروس داورانیشینی بیر آز ده‌ییشیب، کورونایا توتولان‌لار قارین سانجیسی، سیندیریم راحاتسیزلیغی و اسهال علامت‌لری‌یله خسته‌خانالار و درمان مرکزلرینه مراجعه ائدیرلر.

دکتر مهدی حق دوست بو مطلبی دئییب، آرتیردی:کورونانین بولاشدیغی ایلک گون لرده دئییلیردی کورونا توتان‌لارین بیر تعدادیندا اییی و داد آلما حیس‌لری آرادان گئدیر. آما ایندی خسته‌لرین چوخوندا بو حیس‌لرین آرادان گئتمه‌سی اولدوقجا یایقینلاشیب.

او دئدی، قیزدیرما کورونانین اساس علامت‌لریندن دییل. او آرتیردی: کورونا توتان خسته‌لرده یا اصلا قیزدیرما یوخدور یا دا خسته لییین سون آشاماسیندا و خسته‌نین بدحال اولدوغونودا گؤرسنیر.

او دئدی: هر جور بوغاز آغریسی، جان آغریسی یا قارین سانجیسی و اسهال ایله بیرلیکده اولسا، مشکوک ساییلیر، اؤزل‌لیکله ده بو علامت لردن باشقا اییی و داد آلما حیس‌لرینی ده ایتیرمیش اولسالار.

حق دوست دئدی کورونا ویروس‌ون مختلف سطح‌لرده قالارغی‌لیغی فرقلی دیر. او آرتیردی: بو ویروس‌ون کاغاذ اوسته عؤمرو 3 ساعات‌دان آزدیر. حتتا پالتارلاردا دا کورونانین قالارغی‌لیغی پالتارین جینسی و توخوسونا گؤره فرق‌لنیر.

حق دوست دئدی: آراشدیرمالار گؤستریر، کورونا توخونما گئییم‌لرده داها آز قالیر اما دری‌کیمی صاف سطح‌لرده داها چوخ قالیر. آنجاق هر حالتده، کورونانین پالتار اوستونده قالارغی‌لیغی 24 ساعاتدان چوخ دییل.

بو اوزمان، کورونا ویروس‌ون استیل سطح‌لرده قالیجی‌لیغی‌نین چوخ اولدوغونا اشاره ائدیب دئدی: نه یازیق کی، استیل چوخ قوللانیلان بیر ماتریال‌دیر؛ قاپی دسته‌لرینده، آچاریئرلرینده، ماشین دسته لرینده...استیل قوللانیلیر و کورونا 3 گونه کیمی استیل اوزه‌رینده قالا بیلیر.

او دئدی: کورونا تاختا اوزه‌رینده ده آز قالار آنجاق آمریکانین یولوخوجو خسته‌لیک‌لری کونترول ائدن مرکزین راپورونا گؤره، سطح‌لر بولاشدیرماقدان چوخ دا رنگلی رولا صاحیب دییل‌لر. او آرتیردی: بو راپورا گؤره اینسان‌دان اینسانا یولوخمانین داها گوجلو رولو وار، خسته‌لیک‌لرین 80%-ی انسان تماسی ایله یایقین‌لاشیر.

حق دوست خاطیرلاتدی: بعضی‌لری بئله دوشونورلر کی، آسقیریب، اؤسکورمک کورونانین یولوخماسی‌نین تک عامیلی‌دیر، آما دانیشماق دا بو ویروسو بولاشدیرا بیلر.