کولت. آذ آذربایجان‌لی شاعر نصرت کسمنلینین "سندن سونرا" شعرینی تقدیم ائدیر:

اؤزونله آپارمیسان،
گونلریمین رنگینی.
کدر منه بنزییر،
غم کؤورلیر سن کیمی.
ایندی باشا دوشموشم،
سن‌سیز هر شئییم هدر؛
سن‌دن سونرا هئچ کسی،
سئومدیم سنین قدر.
سئوگی دولو باخیشلار،
شکلین‌دن باخیر منه.
دؤنه‌جکسه‌ن بیلیرم،
سن اول-آخیر منه.
من ائله بیلیردیم کی،
هر شئی سویویوب گئدر؛
سن‌دن سونرا هئچ کسی،
سئومدیم سنین قدر.
ایچیم‌ده توفان کیمی،
چاغلاییر خاطره‌لر.
گؤز یاشلاریم قورومور،
آغلاییر خاطره‌لر.
من کدردن دویموشام،
من‌دن دویماییر کدر؛
سن‌دن سونرا هئچ کسی،
سئومدیم سنین قدر.
او قدر یاخین ایکن،
بو قدر اوزاق اولدوق.
یورولدوقمو سئوگیدن،
بیز یاری یولدا قالدیق...
من عذابلار ایچینده،
سن اؤزون مندن بئتر؛
سن‌دن سونرا هئچ کسی،
سئومدیم سنین قدر.