یئرلی آوتومبیل ایستحصال ائتدیکلرینی دئدیلر، بیز ده «یئرلی» دئییریک، اما دیزاینینی ایتالیانلارا حاضیرلاتدیردیلار.

بونو تورکییه‌نین ایلک یئرلی ایستحصالی اولان آوتومبیل حاق‌دا سعادت پارتییاسینین صدری تمل قاراموللاوغلو دئییب.

موخالیفت‌ده اولان پارتییانین باش‌چی‌سی یئنی آوتومبیلی بینمدیینی بیلدیریب:

«بیزیم ایستحصال‌دان دانیشارکن، حاضرلانان آوتومبیلین یوز فایز یئرلی اولماسی همیشه بیزیم ایده‌آلیمیز اولوب. بئله بیر آددیمی آتا بیله‌ن حاکمیته ده دستک وئره بیلریک. اما اوچ ایل اول ده بئله بیرینی دیزاین ائتمیشدیلر. ناظر ده چیخیب تقدیم ائتدی. بس سونرا نه اولدو؟ تاریخه قوووشدو».

ایستانبول شهرینین بلدییه صدری اکرم اماموغلو ایسه قاراموللاوغلودان فرق‌لی اولاراق، یئنی آوتومبیلی بیندیینی، لاییحه‌نی دستکلدیینی قید ائدیب:

«اومید ائدیرم کی، نهایت، بیزیم ده بیر یئرلی آوتومبیلمیز اولاجاق. بو، بیر باشلانغیجدیر. ایستحصال داوام ائتسه، ایستانبول بلدییه‌سی اؤز آوتومبیللریمیزی آلاجاق».

میللتچی حرکات پارتییاسینین (م.ح.پ) صدری دؤولت باغچالی‌دان دا لاییحه‌یه دستک گلیب: «قورور دویدوم. مهندیسلریمیزی، فهله‌لریمیزی، ایش آداملاریمیزی و حکومتیمیزی تبریک ائدیره‌م».