گونئی آذربایجانین تانینمیش یازارلارین‌دان اولان ایواز طاها سون گونلر آذربایجان یازیچیلار بیرلیی-نین گونئی آذربایجان کمیسیاسینین رهبری سایمان آروز اطرافین‌دا باش وئرنلرله باغلیل آ.ی.ب صدری آنارا آچیق مکتوب گؤندریب.

Kult.az مکتوبون متنینی تقدیم ائدیر:

حؤرمتلی آنار معلم!

سون دؤورلرده آذربایجان یازیچیلار بیرلیینین (آ.ی.ب) جنوبی آذربایجان شعبه‌سی اجتماعیتین دقت مرکزینه گلمیشدیر. شعبه‌نین فعالیتی مختلف قلم صاحبلرینین ناراضیلیغینا سبب اولموش، نهایت، اونون اداره‌چی‌لیک طرزینه قارشی گونئی‌دن ۱۸۳ امضانین اعتراض سسی اوجالمیشدیر. من آذربایجان یازیچیلار بیرلیینین عضوو اولاراق، تفرعاتا وارمادان مسئله‌یه معین پرینسیپیال مؤقع‌دن توخونماق ایسته‌ییرم:

۱. شبهه‌سیز، جنوب‌دا دیلیمیزه، دوشونجه‌میزه و مدنیتیمیزه هرطرفلی قایغی گؤسترمک حیاتی اؤنمه مالک اولموشدور. بئله بیر وضعیتده جنوبی آذربایجان شعبه‌سینین مباحثه موضوع‌سونا چئوریلمه‌سی ایلک باخیشدان واخت ایتکی‌سی کیمی قیمتله‌ندیریله بیلردی. لاکن نه یازیق، بو بیر سیمپتوم‌دور؛ یولوخوجو خستلیین کیچیک علامتی. اؤز-اؤزلویونده اهمیتسیز گؤرونه‌ن بو موضوع بؤیوک بیر قورومون آدی ایله باغلی اولدوغوندان رئاکسییالاری لابود ائدیر. اصلینده بالاش آذراوغلونون اوتوردوغو متوازی کورسونون آغیر سیموولیک چکیسینین قورونماسیندان سؤز گئدیر.

۲. بیر نئچه ایل اؤنجه جنوبی آذربایجان شعبه‌سینین معین بیر شخصه (سایمان آروز نظرده توتولور – رئد.) تاپشیریلماسی هامیمیزی تعجبلندیرمیشدی. چونکی بو تشببوس اون میلیونلارلا گونئی آذربایجانلییا، ائلجه ده گونئی‌لی یازارلارا قارشی تحقیر ماهیتی داشییردی. واختیله آدی گونئیین جدی یازارلاری سیراسین‌دا چکیلمه‌یه‌ن بیریسینین بیردن-بیره نهنگ گونئیین تمثیل مقامین‌دا اوتورماسی سانکی پلانلاشدیریلمیش بیر عدالتسیزلیک کیمی رزونانس دوغوردو. لاکن تأسف کی، بو رزونانس خاقانی کوچه‌سین‌ده‌کی یازیچیلار بیرلیینین قاپی‌سینی «دؤیه» بیلمه‌میشدی.

۳. گونئی آذربایجان حاضردا دیل، دوشونجه، مدنیت، ادبیات و اینجه‌صنعت ساحه‌لرینده رنسانسا شاهدلیک ائدیر. ایندی «ویرتوال مکان» حاکم دیسکورسون دمیر شبکه‌سینی داغیداراق، یازارلارا، شاعرلره، متفکرلره و موسیقی‌چیلره تاریخی فرصت یاراتمیشدیر. ایندی گنجلریمیز ایدمان میدانلارین‌دا بئله کیم‌لیک بایراغینی قالدیریرلار. لاکن بو اویانیش بیر گئجه‌ده باش وئرمه‌دی. «تراکتور» فوتبول کومان‌داسینین یوز مینلرله آزارکئشینین استادیونلاردا «تورک دیلینده مدرسه، اولمالی‌دیر هر کسه!" شعارینی سسله‌ندیرمه‌سی سورکلی فعالیتلرین نتیجه‌سی ایدی. بو اودلو شعارلار فلسفی نظریه‌لردن، بدیعی نثرین جمله‌لریندن، شعرلرین مصراعلاریندان بوی آتیب، قورتولوشچو سیاستین عرصه‌سینه فوارلنمیشدیر. هر هانسی عادی بیر شخصی بئله‌جه دالغالانان، جمعیتی سیلکه‌له‌یه‌ن، ملتی اویادان رئاللیق فیرتیناسینین تمثیلچی‌سی کیمی تقدیم ائتمک دوروموزون گولونج کمدییالاریندان بیریدیر.

حؤرمتلی آنار معلم!

اونوتموش اولمازسینیز کی، بیر نئچه ایل اؤنجه سون دفعه گؤروشونوزه گلدیکده ممدکاظم علکبرلی، صیف‌الله شامیلوو، رسول رضا، صمد وورغون، میرزه ابراحیموو، سلیمان رحیموو، مهدی حسین، عمران قاسیموو، اسماعیل شیخلی و آنار کیمی سامباللی شخصیتلرین نفس آلدیغی قورومون آلچالدیلماسیندان دانیشدیم. بونون ایسه یازیچیلار بیرلیینه خلل گتیرجه‌یینی بیلدیردیم. آنجاق بونو آرتیرمادیم کی، سیز تکجه آذربایجانین دئییل، تورک دنیاسینین آدلی یازاریسینیز. هابئله یازیچیلار بیرلیی یارادیجیلیق اوجاغی اولمالی‌دیر، مضمون‌دان فورمایا دوغرو حرکت پروسسینین گوونلی آخاری. محض بونا گؤره ده سیزین قورومسال چئوره‌نیزی یوکسک سؤز صاحبلری احاطه ائتمه‌لیدیر.

دوشونجه، ادبیات و اینجه‌صنعت دیل اقلیمینده یئرلشیر. بو اقلیمه یاراشمایان واسطه ایله هانسی‌سا مدنی استاتوسو قازانماق، وارلیغین یووالاندیغی «سؤز»او یارالاییر. یارالی سؤزدن ایسه توپلومون روحو کدرلنیر.

درین سایغی ایله،

«یول»، «جهان» ژورناللاری و «یارپاق» قزئتینین باش یازاری

ایواز طاها».