سپاه و ایران کشفیات ناظرلیینه باغلی مرکزلر سوسیال مئدیا، خصوصاً تلگرام کانالی واسطه‌سیله جاسوس توپلاییرلار.

Axar.az خبر وئریر کی، بو باره‌ده تکلیف آلان بعضی استفاده‌چیلر بیلدیریبلر.

معلوماتا گؤره، آدی چکیلن مرکزلر تلگرام کانالینینی اداره ائتمک اوچون آدمین آختاردیقلاری باره‌ده اعلان وئریرلر. تکلیف اولونان مبلغه گؤره همین اعلانلا باغلی مراجعه ائد‌ن خصوصاً یوخسول شخصلره هم ده فیسبوک سوسیال شبکه‌سینده یئنی صحیفه آچیلیر، اونلاردان هله‌لیک بو آدلارلا ایرانین سیاسی-ایدئولوژی تبلیغاتی ایله مشغول اولان صحیفه‌لری بیه‌نمه‌لری، "فایدالی" شرحلر یازمالاری ایستنیلیر.

بل‌لی بیر مدت‌دن سونرا "سیناق‌دان چیخان" همین سوسیال مئدیا استفاده‌چیلرینه علاوه تاپیشیریقلار وئریلیر، اونلاردان اؤز صحیفه‌لرینده ده ایران حکومتی خیرینه تبلیغات مزمونلو پایلاشیملار ائدیلمه‌سی تاپیشیریلیر.

معلوماتلارا گؤره، بیر سیرا خصوصی حاللار و حساس زمانلاردا همین شخصلره پایلاشماق اوچون حاضر ماتئریاللار گؤندریلیر.

بونون خصوصاً ایرانلا حساس مناسبتلرده اولان، ایران‌لی سیاسی فعاللارین چوخ اولدوغو و اسرائیلله علاقه‌لری یاخشی اولان اؤلکه‌لرین وطنداشلارینی هدف آلدیغی بیلدیریلیر.

بعضی معلوماتلارا گؤره، حاضردا ایران‌دا یاشایان یئرلی تروللار اوچون گونده‌لیک مواجب ۴۰۰،۰۰۰ تومن (تخمیناً ۴ آزن)، یئنیجه جلب اولونان آذربایجان رسپوبلیکاسی وطنداشلاری اوچون ده همین مبلغ نظرده توتولور.

روسیا و باشقا اؤلکه‌لرده یاشایان آذربایجانلیلار اوچون ایسه بو مبلغین داها یوکسیک اولدوغو قید اولونور.

اله آلینان شخصلره کریپتووالیوتا (و یا اؤدنیش تطبیقلری) ایله ائدیلن اؤدنیشلر دینامیک (بیردفعه‌لیک) کدلار کیمی ایننوواتیو متودلار واسطه‌سیله حیاتا کئچیریلیر. بو متودلار عملیاتلارین تهلوکسیزلیینی خیلی آرتیریر و فیزیکی کارتلارا و یا ال ایله معلوماتلارین داخل ائدیلمه‌سینه احتیاجی آرادان قالدیریر.
بونونلا یاناشی اؤدنیشلر ایران‌لی صرافلاردان (پول دییشه‌ن) عبارت شبکه‌یه باغلی شخصلر واسطه‌سیله ده حیاتا کئچیریلیر.

معلومات‌لی منبع‌لرین بیلدیردیینه گؤره، خصوصاً آذربایجان رسپوبلیکاسی، گرجستان، تورکیه و اورتا آسیا اؤلکه‌لرینده بللی بیر مدتدن سونرا تجروبه قازانان، صداقتلرینی ثبوت ائد‌ن شخصلر ایران کشفیات گروپلاری و سپاه-ا باغلی بیزنس شبکه‌سی ایله علاقه‌لندیرلیر، اونلارین داها چوخ مادی قازانج الده ائتمه‌سی و قید اولونان مقصدلر اوچون داها چوخ "امکداش"این جلب اولونماسی اوچون علاوه امکانلار یارادیلیر.

بو گونه کیمی بعضی اؤلکه‌لرده، خصوصاً اسرائیل و آوسترالیادا بو واسطه ایله اله آلینان شخصلر ساخلانیلیب، اونلار قید اولونان فورمادا الده ائتدیکلری اؤدنیشلر قارشیلیغیندا ایرانا طلب اولونان معلوماتلاری اؤتوردوکلرینی و تبلیغاتچی، ترول کیمی فعالیت گؤستردیکلرینی اعتراف ائدیبلر.

آوسترالیادا بو داها گئنیش یاییلدیغی اوچون اؤلکه پلیسی وطنداشلارا خبردارلیق ائد‌رک، اونلاردان ایران منشأ‌لی بو قبیل‌دن اولان تکلیف و "ایش" اعلانلاری باره‌ده علاقه‌دار دولت قوروملارینا معلومات وئرمه‌لرینی ایسته‌ییب.