تبریز شهر شوراسینین عضوو، ملا رسول برگی شورانین دوننکی اجلاسین‌دا آذربایجان رسپوبلیکاسینین «ایران تورپاغی» اولدوغو باره‌ده ادعا ایر‌لی سوروب.

Axar.az خبر وئریر کی، برگینین بو چیخیشی ایران سوسیال مئدیا شبکه‌سین‌ده گئنیش یاییلب.

«سرحدین او تایین‌دا اولان بعضیلری چیچک‌لنیرلر، منیم بعضی چیخیشلاریم‌دان سو-استفاده ائدیرلر. بیلملیدیرلر کی، بیز ایرانین اولان آذربایجانا اینانیریق. او بیری آذربایجان دا ایرانین‌دیر و بیزدن آیریلیب، بیر گون یئنه ایرانین اولاجاق»، - تبریزلی ملا دئییب.

برگی آذربایجان رسپوبلیکاسین‌دا حجاب‌لی قیزلارین مکتبلره بوراخیلمادیغی باره‌ده ادعالاری تکرار ائدیب و اونلارا دستک وئردیینی، «دولتین سؤزونو دینله‌ییب حجاب‌دان امتنا ائتمدیکلرینه گؤره» اونلارا جانینی دا قربان وئرمه‌یه حاضر اولدوغونو بیلدیریب، آذربایجان‌لی قیز و قادینلاری یوللارینی داوام ائتدیرمه‌یه چاغیریب.

«ایران ملتی شهادت و امام حسین ملتی‌دیر. ایران بایراغی ابولفضل بایراغی‌دیر. بو بایراغی بوراخیب باشقا بایراغین آلتینا گئتمره‌م، ایران تورپاغینین بیر اووجونو بو اؤلکه‌ده آیریلیق سالماق ایسته‌یه‌نلرین سارایلاری ایله دییشمره‌م»، - برگی علاوه ائدیب.

او، ایران‌دا یاشایان بوتون آذربایجان‌لیلارین «ایرانین تورکلری» اولدوغونو دئییب، خاریج‌دن اولان چیخیشلارین آبسورد اولدوغونو بیلدیریب:

«بیز قوزی آذربایجان، گونی آذربایجان تورکلری دئییلیک، بیز هامیمیز ایرانین تورکلریییک و ایران تورکلری اولماغیمیزلا فخر ائدیریک».
رسول برگی ایرانین اوغروندا شهید اولماغا حاضر اولدوغونو دئییب:

«اؤزلرینی ییغیشدیرسینلار، من ایران بایراغینین توزونو بئله اونلارین بایراقلاری ایله دییشمره‌م».

قید ائدک کی، رسول برگی بیر مدت اول «بیزیم آنا دیلیمیز تورکجه‌دیر، فارس دیلی دئییل» مزمونلو چیخیش ائتدیکدن سونرا آذربایجان سوسیال شبکه‌سی و بعضی سایتلاردا اونو «ملی دین خادمی» کیمی تقدیم ائدیبلر.

برگی ایسه بو چیخیشی ایله همین پایلاشیملارا جواب وئریب.