خوی ساکینلرینین اؤزلرینین آرتیق درجه‌ده یاردیما احتیاجی وار. بونا رغما، اونلارین تورکییه‌یه یاردیم ائتمه‌سی فرقلی بیر مساژ کاراکتری داشیییر.

بو سؤزلری Axar.az-آ تانینمیش گونئی‌لی میللی فعال مهدی نعیمی دئییب.

او بیلدیریب کی، خوی ساکینلری بو آددیملا «چتین گونلریمیزده سیزه یاردیم ائتمه‌یه حاضیریق» مساژینی وئریرلر:

«امکان اولدوغو یئرده یاردیم ائتمک بیر مسئله‌دیر، اما امکانسیزلیقلا یاردیما قاچماق بامباشقا بیر مسئله‌دیر. خویون زلزله‌دن ضرر گؤرن اهالیسی بو ایکینجی واریانتی گؤزل بیر شکیلده سرگیله‌دیلر. گونئی آذربایجانین تورکییه ایله قدیمدن قونشولوق علاقه‌لری واردیر. خوی شهری تورکییه‌یه داها یاخین اولدوغو اوچون تورکییه ایله داها دوغما باغلاری قورولوب. اؤزل‌لیکله، ۱۹۱۸-جی ایلین مارت آیینداکی قانلی جیلوولوق فاجعه‌سینده، عثمانلی اوردوسونون گونئی آذربایجانین غرب شهرلرینه یاردیم ائدیب، اونلاری کوردلرین، آسورلارین و ارمنیلرین ظلموندن قورتارماسی هله ده میللتیمیزین یادداشیندادیر».

مهدی نعیمی بیلدیریب کی، گونی آذربایجان کئچمیش گونلرده اولدوغو کیمی. ایندی ده تورکییه‌نین هر زامان دستیینی حس ائدیر:

«سون ایللرده تورکییه‌نین تورک دونیاسیندا اولان چکیجی رولو بو اؤلکه‌نی اولوسوموزون گؤزونده داها یوکسک یئرلره قالدیریب. ۲۰۲۰-جی ایلدکی ۴۴ گونلوک قاراباغین آزادلیغی اوغروندا گئدن ساواشدا دا تورکییه‌نین دستیینی میللتیمیز یوکسک درجه‌ده قیمتلندیریب. گونئی آذربایجانین مستقیللیینه گئدن یولدا و بو ایستیقامتده آپاریلان مدنی مباریزه‌ده قوزئی آذربایجانین، همچینین تورکییه‌نین اؤنملی رولو و دستیی گؤزلنیلمکده‌دیر».

قید ائدک کی، گونئی آذربایجانین خوی شهریندن اولان فعاللار تورکییه‌ده زلزله‌دن ضرر چکن اینسانلارا یاردیملار گؤندریبلر. یاردیملارین اوزرینه «خوی زلزله‌سینده ضرر چکه‌نلرین تورکییه‌ده زلزله‌دن ضرر چکن باجی-قارداشلارینا یاردیمی» یازیلیب.