بریتانیادا یاشایرام، آنجاق حاضردا آلمانیادایام. برلین یوروشونده اشتراک ائدیب، بیر نئچه ماهنی سسلندیرجم.

بو سؤزلری Axar.az-آ تانینمیش گونئیلی صنعتچی فرهاد نیشات «آزادلیق، عدالت، ملی حکومت» یوروشو حاقیندا دانیشارکن دئییب.

برلین آکسیاسینین اهمیتینی دقته چاتدیران صنعتچی خارجده باش توتاجاق بو نمایشین گونئیین داخلی سسی ایله اوزلاشدیغینی بیلدیریب:

«۲۰۱۰-جو ایلدن سونرا آوروپادا یاشایان گونئی آذربایجانلیلاری بیر آرایا گله بیلممیشدی. خارجده کئچیریلن آزسایلی اعتراضلار ایسه داغینیق و کوردیناسیاسیز تشکیل اولونوردو. اما سون ایکی آین ایچینده گونئی آذربایجانلیلار یئنیدن بیر آرایا گله بیلدیلر. سنتیابر آکسیالارینا نظر سالساق، ایرانداکی عمومخالق اعتراضلاریندان کناردا قالمایان گونئی آذربایجانلیلارین شعارلاری مرکزیؤنلو شعارلاردان فرقلی ایدی. گونئی آذربایجانلیلارین علاوه ایستکلری اولوب: او دا «آزادلیق، عدالت، ملی حکومت». آوروپادا کئچیریلن آکسیالاردا دا بو، اساس شعار اولاجاق. او دئمکدیر کی، خارجده کئچیریلن بو جور یوروشلر گونئی آذربایجانین داخلده‌کی سسینی دنیایا و آوروپایا چیخاراجاق».

فرهاد نیشات آکسیا اشتراکچیلارینا علاوه موتیواسیا مقصدی ایله وطن‌پرورلیک روحوندا ماهنیلار ایفا ائدجیینی بیلدیریب:

«ایچریدن منه شعر گؤندریبلر. لاکین مؤلفین آدینی آچیقلایا بیلمرم. اونون اوچون تهلوکه‌لی اولار. همین شعره موسیقی قوشموشام. تام بسته‌لنمه‌ییب. واخت چاتمادی دئیه سس ترتیباتی نظاملانماییب. آکسیا زمانی میکرافون آرخاسیندا اوخویاجام. آزادلیق و وطن‌پرور مضمونلو بیر موسیقیدیر. شعرین آدی دا ائله «آزادلیق، عدالت، ملی حکومت» آدلانیر. دیگر ماهنیم ایسه ۲۰ ایل بوندان اؤنجه ایفا اولونموش بیر ایتالیان ماهنیسی اولاجاق. مضمونو بیر عسگرین آلین یازیسی حاقیندادیر. بیر حصه‌سی ایتالیانجا، بیر قسمی ایسه آذربایجان دیلینده سسلنجک. سؤزلرینی قارداشیم و پشکار موسیقیچی خوسرو امیری حاضرلاییب. دیگر ایفام ایسه »آذربایجان اوغلویام» ماهنیسی اولاجاق. ممدباغیر باغیرزاده‌نین رپرتوارینداندیر».

قید ائدک کی، گونئی آذربایجانلیلارین آوروپادا نؤبتی گئنیش‌مقیاسلی آکسیاسی اولان برلین یوروشو ماین ۲۰-ده باش توتاجاق.