روسیا باش ناظرینین معاوینی اوورچوکون آچیقلاماسیندان سواللار یارانیر: ارمنیستان طرفدن سرحد و گمرک خدمتی نئجه حیاتا کئچیریلجک، بو، ارمنیستانین سرحدچیلری و گمرکچولری اولاجاق، یوخسا نظارتی روسیا حیاتا کئچیرجک؟ آذربایجان و ارمنیستان عموم‌دنیا گمرک تشکیلاتینین دستییندن یارارلاناجاقلارمی؟

Axar.az خبر وئریر کی، بو سؤزلری پولیتولوگ ائلخان شاهین‌اوغلو روسیا باش ناظرینین معاوینی آلکسی اوورچوکون ۲ ایوندا مسکوادا کئچیریلن گؤروشده الده ائدیلن راضیلیقلار باره‌ده آچیقلاماسی حاقیندا قید ائدیب.

پولیتولوگ بیلدیریب کی، بو سوال آذربایجان پرزیدنتی ایلهام علیئوله ارمنیستانین باش ناظری نیکول پاشینیان آراسیندا ماین ۱۴-ده بروکسلده آوروپا بیرلیی شوراسینین رهبری شارل میشلین واسطه‌چیلیی ایله کئچیریلن گؤروشده عموم‌دنیا گمرک تشکیلاتینین امکانلاریندان استفاده ائدیلمه‌سی باره‌ده شفاهی راضیلیق الده ائدیلدیی اوچون آکتوالدیر:

«بو باره‌ده گؤروشدن سونرا شارل میشلین آچیقلاماسی اولموشدو. اوورچوک میشلدن فرقلی اولاراق، آچیقلاماسیندا عموم‌دنیا گمرک تشکیلاتینین آدینی چکمه‌ییب. دئملی، مسکوا بو تشکیلاتین ارمنیستانلا آذربایجان آراسیندا گمرک فعالیتی گؤسترمسینین علیه‌اینه‌دیر، اؤزونو بو رولدا گؤرور».

قید ائدک کی، روسیا باش ناظرینین معاوینی آلکسی اوورچوک گؤروشله باغلی آچیقلاماسیندا طرفلرین یوکلرین داشینماسیندا گمرک نظارتینین نئجه حیاتا کئچیریلجیی ایله باغلی راضیلیغا گلدیینی بیلدیریب. اونون سؤزلرینه گؤره، بو، دمیر یولو، پاسپورت، سرحد، گمرک نظارتی اولان عادی سرحد اولاجاق.