آلبانیا پلیسینین ایونون ۲۰-دا ایران حاکمیتینه قارشی باریشماز مؤقعده اولان ایران خالق مجاهدلری تشکیلاتینین مانز شهرینده یئرلشن منزل قرارگاهینا هجومو آمریکا-ایران آراسیندا گیزلی راضیلاشمانین ایلکین نتیجه‌لریندن بیریدیر.

بو سؤزلری Axar.az-آ آچیقلاماسیندا ایران خالق مجاهدلری تشکیلاتینین عضوو یوسف سهند دئییب.

او، تشکیلاتا ائدیله‌ن هجومون آرخاسین‌دا آمریکانین دایاندیغینی بیلدیریب:

«تیرانا حکومتینین مخالف تشکیلاتا قارشی بئله حرکتی سون آیلار آمریکا ایله ایران حاکمیتی آراسیندا گیزلی دانیشیقلارین گئتدیی باره‌ده معلوماتلارین دوغرو اولدوغونا دلالت ائدیر. بایدن حکومتی ملا رژیمینین سقوطوندا ماراقلی اولمادیغی اوچون رژیمه قارشی جدی آلترناتیو اولان خالق مجاهدلری تشکیلاتینین آلبانیادا یئرلشن منزل-قرارگاهینا هجوما یاشیل ایشیق یاندیریب. آلبانیانین واشینگتونون ایستییندن فرقلی حرکت ائده بیلمیجیینی نظره آلساق، بو هجومون آرخاسیندا آمریکا حاکمیتینین اولدوغونو دئمک اولار. بونونلا یاناشی، ابراهیم رئیسی ایله فرانسا پرزیدنتی امانوئل ماکرونون تلفون دانیشیغیندان سونرا خالق مجاهدلری تشکیلاتینین ایولون ۱-ده پاریسده کئچیریلمسی پلانلاشدیریلان قورولتایی فرانسا حکومتی طرفیندن لغو ائدیلیب. بو حادثه‌لر بیر-بیری ایله باغلیدیر و بورادا تصادفی هئچ نه یوخدور".

سهند آمریکا دولت دپارتامنتینین آلبانیا حکومتینین حرکتینه برئت قازاندیران بیاناتینا توخونوب:

«دولت دپارتامنتی مسئله ایله باغلی یایدیغی بیاناتدا خالق مجاهدلری تشکیلاتینین ایرانین دموکراتیک حرکاتی و ایراندا یاشایان خالقلارین تمثیلچی‌سی اولمادیغینی ادعا ائدیب. بو بیانات دا اؤزلویونده مجاهیدلره قارشی هجومون آرخاسیندا آمریکانین دایاندیغینی گؤستریر. آمریکا ایراندا یاشایان خالقلارین دئییل، اؤزونون ماراقلارینی گودور، بو استقامتده اونون تاپیشیریقلارینی سورغو-سوال‌سیز یئرینه یئتیرن جریان و شخصلری مدافعه ائدیر. خالق مجاهدلری تشکیلاتی ۵۰ ایلدن چوخ فعالیت کئچمیشی اولان تشکیلات کیمی ایراندا یاشایان بوتون خالقلارین حقوقلارینین مدافعه‌چی‌سی اولدوغونو ثبوت ائدیب. بو، تشکیلاتین پروگرامیندا دا عکس اولونوب. قوروم رهبرلیینین بوتون چیخیشلاریندا بونون پریوریتت اولدوغو بیلدیریلیب. آمریکا دولت دپارتامنتینین بیاناتی بو حقیقتی دییشه بیلمز».

یوسف سهندین سؤزلرینه گؤره، آمریکا بو واسطه ایله اؤز ماراقلاری اوچون ایستنیلن واخت ملا رژیمینین آرخاسیندا دوراجاغینی بیر داها ثبوت ائتدی:
«آمریکانین راضی‌لیغی ایله آلبانیا پلیسینین خالق مجاهیدلری تشکیلاتینین منزل-قرارگاهینا هجومو واشینگتونون ایران خالقلارینا و ملا رژیمینه قارشی مبارزه آپاران حقیقی مخالفته نؤوبتی خیانتیدیر. بونو نظره آلمالی، رژیمه قارشی مبارزه‌ده خالقلارین و گئرچک مخالیفتین بیرلیینه چالیشیلمالیدیر».

او، بوندان اؤنجه مجاهدلرین عراقدا یئرلشن «اشرف-۲» قرارگاهینا ایرانین سپاه و تهلوکه‌سیزلیک قوه‌لرینین هجوم ائتدیینی، نتیجه‌ده ۵۰-دن چوخ مجاهدین اؤلدورولدویونو، اونلارلا مجاهدین یارالاندیغینی خاتیرلادیب:

«بونا باخمایاراق، خالق مجاهدلری تشکیلاتی مبارزه‌سینی داوام ائتدیردی. بو کیمی هجوملار مبارزه‌میزه مانع اولا بیلمز، عکسینه داها عزمکار چالیشماغا، کونسانتراسیا اولماغیمیزا سبب اولور. ملا رژیمینین دئوریلمسی و ظالملارین عدالت محکمه‌سینه چیخاریلماسینا قدر بو مبارزه داوام ائد‌جک. گونده‌لیک فردی و گروپ ماراقلارینا دئییل، عمومی آمال و ایستکلریمیزه باغلیلیغیمیز قالیبیتیمیزی قاچیلماز ائدیر».

قید ائدک کی، ایونون ۲۰-سی گونورتا ساعتلاریندا آلبانییانین یوزلرله پلیسی ایران خالق مجاهدلری تشکیلاتینین منزل-قرارگاهینا هجوم ائدیب. بونا اعتراض ائد‌ن مجاهدلرله پلیس قوه‌لری آراسیندا گرگینلیک یاشانیب، نتیجه‌ده عبدالوهاب فرجینژاد آدلی تشکیلات عضوو اؤلوب، ۱۰۰ نفر بیبر گازیندان زهرلنیب و ۷۰ نفر حبس ائدیلیب. آلبانیا حکومتی ایسه ایران خالق مجاهدلری تشکیلاتینین کیبر هجوملار حیاتا کئچیردیی اوچون بو اؤلکه ایله تشکیلات آراسیندا ۲۰۱۴-جو ایلده باغلانان مقاوله‌یه ضد داوراندیقلارینی ادعا ائدیب.