حزبوللاهین رهبری حسن نصروللاه گونئی آذربایجانا سلام گؤندره‌رک دئییب کی، اونلار خامنه‌اینین امریندن چیخماسینلار. اونون گونئی آذربایجانا مساژینی تهدید کیمی دیرلندیرمک اولار.

بو سؤزلری Axar.az-آ گونئی آذربایجان میللی دیرنیش تشکیلاتینین سؤزچوسو مجید جوادی حزبوللاه رهبرینین اردبیلین جمعه امامی حسن عاملی واسطه‌سی ایله گونئی‌لیلره گؤندردیی مئساژی شرح ائدرکه‌ن دئییب.

اونون سؤزلرینه گؤره، بو، عادی مئساژدان داها چوخ تهدیددیر و ترور گروپونون رهبری بونونلا رژیمین یانیندا اولدوقلارینی گؤسترمک ایستییر:

«اردبیلین جمعه امامی حسن عاملی اؤزو لیوان اصیللیدیر. لیوانین جبلالعامل بؤلگه‌سینده‌دیر. آذربایجانا سونرادان گلیبلر. عینی کؤکدن اولان ایکی اینسان گؤروشوب، آذربایجانی مذاکیره ائدیبلر. هئچ واخت گونئی آذربایجانین حقوقوندان، دیل حاقلاریندان، اقتصادی و سیاسی آیری-سئچکیلییندن دانیشمایان بیر آدامین گونئی‌لیلره چاتدیردیغی سؤزلر باشقا جور ده آنلاشیلا بیلمز».

جوادی بیلدرییب کی، رژیمه باغلیلیغی ایله سئچیلن حزبوللاه تشکیلاتی آذربایجانلیلارا قارشی اصل سیماسینی دفعه‌لرله گؤستریب:

«نصروللاهین و ایرانا باغلی اولان دیگر ترور گروپلارینین آذربایجانا قارشی سیاستلرینی و عمللرینی اوزون ایللردن بریدیر کی، گؤرموشوک. بونلار قاراباغ محاربه‌سینده آچیق شکیلده ارمنیستانی دستکله‌ییبلر. ایران‌دا و گونئی آذربایجان‌دا کئچیریلن خالق اعتراضلارینین یاتیریلماسیندا رژیمین یانین‌دا اولوبلار. اونلارا دستک وئریبلر».

سؤزچو حساب ائدیر کی، مئساژین ایندیکی مقام‌دا گؤندریلمه‌سی رژیمین و اونون اطرافینین آذربایجانلا باغلی باش وئره‌ن حادثه‌لره رئاکسییاسیدیر:

«ایران‌دا آذربایجان مسئله‌سی چوخ آکتوالدیر. گونئی آذربایجانلا یاناشی، قوزئیله مناسیبتلرده گرگینلیک یاشانیر. اورمییا گؤلو ایله باغلی خالقین گوندن-گونه آرتان ناراضی‌لیغی و اویانیشی رژیم طرفدارلارینی ناراحات ائدیر. ایندیکی وضعیتده بو، ساده‌جه، خبردارلیقدیر. لاکین یاخین زامانلاردا ایران‌دا قاریشیقلیق دوشسه، آذربایجان تورکلرینه قارشی ترور عمللرینه ال آتاجاقلاری استثنا اولونمور. چونکی گونئی آذربایجان‌لیلارین ایران‌دا اساس تأثیر قوه‌لریندن بیری اولدوغونو آنلاییرلار. بئله تهدیدلر گونئی آذربایجانی اؤز یولون‌دان دؤندره بیلمز. آذربایجان تورکلرینین نصروللاه کیمیلرین سؤزونه محل قویاجاقلارینی دوشونموره‌م. اونلار میللی مجادیله‌لرینی بئله بوش سؤزلره فیکیر وئرمه‌دن داوام ائتدیره‌جکلر. بیزیم میللتین اوزرینده بو مساژین تأثیر گوجو یوخدور. ساده‌جه، دوشمه‌نلریمیزی داها یاخشی تانیمیش اولوروق».