گونئی آذربایجانین تانینمیش میللی فعاللاریندان اولان یوروش (آیت) مهرعلی بیگلینین ۶ گوندور هارادا اولماسی و هانسی شرایط‌ده ساخلانیلدیغینا دائر معلومات یوخ‌دور.

Axar.az خبر وئریر کی، «قوپوز» ژورنالینین کئچمیش دیرکتور و رداکتورو اولان مهرعلی‌بیگلی نویابرین ۷-سی گرگر شهرینده سلاح‌لی اطلاعات مأمورلاری طرفیندن ساخلانیلیب.

او، ۱۹۷۹-جو ایلین یانوارین ۳۱-ده شرقی آذربایجانین خاروانا رایونونون قارلیجا یایلاغیندا آنادان اولوب. سونرالار عائله‌سی جولفا شهرینین شوجا کندینه کؤچور. بو کندده بؤیوین یوروش مهرعلی‌ بیگلی تام اورتا مکتبی علمدار شهرینده بیتیردیکدن سونرا رشت اونیورسیتتینین «صنایع اداره‌چیلیک» اختصاصینا داخل اولور و بورانی بیتیریر. آردینجا تهرانین تربیت مدرس اونیورسیتتینه داخل اولاراق ماگیستر درجه‌سینی ده باشا چاتدیریر. لاکن اونون دوکتورانتورا درجه‌سینده تحصیل آلماسینا اجازه وئریلمیر.

ایلک دفعه ۲۰۰۲-جی ایلین ۱۲ دکابر تاریخیندا شبستر شهرینده، پروفسور محمدتقی زهتابینین مزاری اوسته توتولاراق بیر آیدان سونرا آزادلیغا بوراخیلیر. ایکی ایل سونرا - ۲۰۰۵-جی ایلده بز (بابک) قالاسیندا کئچیریلن میتینگ زمانی یئنی‌دن حبس ائدیله‌رک ۲ آی ساخلانیلیر. او، ۲۰۰۶-جی ایلدکی خرداد اعتراضلاریندا بیر داها حبس اولونور. ۲۰۱۰-جو ایلین مای آیندا ایسه گونئی آذربایجان میللی اویانیش حرکاتینا (گاموح) عضو اولدوغو اوچون ۹ آی حبسده ساخلانیلمیشدی. بو مدتین ۷ آیینی تک‌نفرلیک کامرادا کئچیریب. یوروش مهرعلی‌ بیگلی حبسدن آزاد ائدیلدیکدن سونرا اورادا یاشادیغی گونلری و ایشگنجه‌لری «قارچیچیی» آدلی کتابیندا قلمه آلیب.

او، ۲۰۱۲-جی ایلده «یئنی گاموح» تشکیلاتینین یارادیلماسیندا اتهام اولوناراق ۹ ایل مدتینه آزادلیقدان محروم ائدیلیر، ۵ ایل سونرا ایسه شرطی آزادلیغا بوراخیلیر.