بیر هفته بوندان اؤنجه پلیسه باش ووردوق. فورالین ۲۵-ده ایسوچین هؤتئبورگ شهرین‌ده گونئی آذربایجانین سیاسی محبوسلارینین آزاد ائدیلمه‌سی طلبی ایله میتینق کئچیرمک ایستییمیزی بیلدیردیک. راضی‌لیق الده اولوندو و آکسییایا حاضیرلاشیریق.

بو سؤزلری Axar.az-آ آذربایجان دموکرات پارتییاسینین سؤزچوسو محمود بیلگین گونئی‌لیلرین آوروپادا کئچیرمک ایستدیکلری آکسییا حاقین‌دا دانیشارکه‌ن دئییب.

سیاسی محبوسلارین توتولماسینین ۳-جو دالغاسینین باشلادیغینی دئیه‌ن بیلگین بیلدیریب کی، ایران رژیمینین بو قدارلیغینی غرب اؤلکه‌لری ده بیلمه‌لیدیر:

«هر گون میللی فعاللارین توتولماسی ایله باغلی خبرلر آلیریق. گونئی آذربایجانین، ایرانین مختلیف شهرلرین‌دن اینسانلاری هئچ بیر اساس اولمادان حبسه آتیرلار. بیز ده اونلارین حاقینی مدافعه ائتمک اوچون بیر آرایا گلمک ایستییریک. بازار گونو هؤتئبورگدا برونسپارکنده ساعت ۱۴-دن ۱۵-دک ییغیشیب، اؤز سؤزوموزو دئمه‌یه جهد ائدجییک. میللی حاقلاریمیز، اورمو گؤلونون قورودولماسی و اونلارلا بیزی ناراحات ائد‌ن پروبلملری آکسییا اشتراکچیلارینین دقتینه چاتدیرماغی پلانلاشدیریریق. آوروپادا یاشایان سویداشلاریمیز دا بیزه قوشولسالار، گوجوموزو هامی گؤرر. آکسییامیزا عربلری ده دعوت ائتمیشیک. اونلار دا بیزیمله بیرگه بازار گونو آکسییادا اشتراک ائد‌جکلر».