داخیل‌ده اینسانلار ایرانین اسرایلله مناقیشه‌سینی «راکت شووسو»اولاراق دیرلندیریر. اهالی بونو بئله گؤرور. ایران‌دا یاشایان خالقلار حساب ائدیر کی، اسرائیل ایرانین دوشمنی دئییل. حتی دوشونوروک کی، رژیم اوچون ده اسرائیل دوشمن دئییل، ساده‌جه بیر اویوندور، سیاست‌دیر یورودورلر.

بو سؤزلری Axar.az-آ گونئی‌دن اولان ملی فعال سورگون گونش ایران-اسرائیل مناقیشه‌سینه خالقین مناسیبتینی شرح ائدرکه‌ن دئییب. اونون سؤزلرینه گؤره، حکومت حاضیرکی دورومدان اؤز خئیرینه فایدالانیر:

«اصلینده اقتصادی بحران ایچین‌ده بوغولان ایران رژیمینه بو جور کیچیک ساواشلار صرف ائدیر. پروبلمی خالقین گؤزونده بئله اصوللا چؤزدویونو دوشونور. اسرائیل طرفدن هر هانسی بیر راکت آتیلسا، رژیمین عمرونو اوزاداجاق. بیز دوشونوروک کی، اسرائیله راکت هجومو عین الاسده آمریکا حربی بازاسینی ووراندا باش وئرن حادثه‌نین بنزری ایدی. یعنی اؤنجه‌دن پلانلاشدیریلمیش بیر مسئله ایدی. تهران رژیمی اسرائیلی اؤنجه‌دن خبردار ائتمیشدی».

سورگون گونشین سؤزلرینه گؤره، ایران و اسرائیل آراسیندا جدی محاربه ریسکینین اولماسی رئال دئییل:

«خالق بونو آنلاییر، لاکین اونلاری باشقا مسئله‌لر ده ناراحات ائدیر. بئله بیر خبرلر گزیر کی، اسرائیل ده یاخین گونلرده ایرانا جواب ضربه‌سی ائندیره‌جک. حاکمیت بوندان ناراحات گؤرونمور. رژیم اسرائیل‌دن فرقلی اولاراق بیزه بیلدیریشلر، خبردارلیقلار، تهلوکه‌سیزلیکله باغلی تعلیماتلار گؤندرمه‌ییب. نئجه اولور کی، اسرائیل اؤز وطنداشلارینا هجوم‌دان بیر نئچه گون اول تدبیرلی اولماغی، اؤزلری ایله ارزاق، سو، بو کیمی ضروری شئیلری اؤنجه‌دن گؤتورمیی تؤصییه ائتمیشدی. ایران‌دا ائله شئی یوخدور. بونلار هئچ حکومتین فیکریندن ده کئچمیر. اگر اسرائیل هجوم ائتسه ده، امینیک کی، حاکمیت جدی بیر آددیم آتمایاجاق. بیر-ایکی نفت و نفت-کیمیا مرکزلرینی ووروب ملتی آغیر دوروما سالاجاق. اسرائیل خامنه‌اینین، یاخود سپاه-ین یوکسک روتبه‌لی ظابطلرینین، رژیمه یاخین آداملارین ائوینی وورمایاجاق. هدفده ساده، یازیق ملت اولاجاق. یاخود، آتیلان راکتلرین سهوه‌ن یاشاییش بیناسینا دوشمیجیینه کیم ضمانت وئرر؟ ایرانین اساس اوبیکلری هدفده‌دیرسه، نوه مرکزلرینین وورولاجاغی دئییلیرسه، اونون یاراتدیغی تهلوکه‌نی تصور ائتمک بئله چتیندیر؟ ایران رژیمی بونو دوشونمورمو؟ خالق آراسیندا هر هانسی تهلوکه‌سیزلیکله باغلی تدبیرلر، معاریفله‌نمه ایشلری آپارمیر. یئرآلتی سیغیناجاقلار وارمی، یوخمو هئچ بیلمیرم. زیرزمیلر و قاپالی یئرلر ایران-عراق محاربه‌سیندن قالمادیر. اونلارین دا وضعیتینین نئجه اولماسی باره‌ده هئچ نه بیلمیریک. دؤرد طرفی ایله دوشمن‌چیلیک ائد‌ن رژیم خالقین تهلوکسیزلیینی دوشونمور و اهالینین کریتیک گونلرده پناه آپارا بیلجیی یئنی سیغیناجاقلار دا یاراتماییب. خالقین باشینا بئله بیر اویون گلسه، لاپ جدی محاربه اولسا، ان آزی بیر راکت آتیلسا، قاچیب گیزله‌نمه‌یه یئریمیز یوخدور. بونلارین هیجان سیگنالی ایله خالقی خبردار ائد‌جکلرینه ده امین دئییلیک. حاضردا بئله بیر پانیک وضعیتده گونلریمیزی ساییریق».