ایرانین اسرائیله راکت هجومو و تلاویوین گؤزله‌نیله‌ن جواب ضربه‌لری اؤنجه‌سی ایرانین واجیب متفیقلریندن اولان سورییانین موقعین‌دن جدی دییشیک‌لیک حس اولونور.

بو، خصوصا اسرائیلین لیوان حزبوللاهینا ائندیردیی سارسیدیجی ضربه‌لر، گروپلاشمانین رهبری حسن نصروللاهین اؤلدورولمه‌سیندن سونرا داها دا سرعتلنیب.

دمشقین تهرانین گؤزلدییندن فرق‌لی اولاراق مسئله‌یه سویوق قانلی یاناشماسی علی خامنه‌ای و سپاه کوماندیرلرینین ناراضی‌لیغینا سبب اولوب.

ایرانین خاریجی ایشلر ناظری عباس عراقچینین اوکتیابرین ۵-ده دمشقه سفرینین ده بونونلا باغلی اولدوغو، اونون علی خامنه‌ای و سپاه-ین بشار اسدین اسرائیلین هجومو ایله باغلی موقعین‌دن ناراضی‌لیقلارینین رسمی دمشقه چاتدیریلدیغی بیلدیریلیر.

تهران-دمشق آراسیندا مناسیبتلرین سویوماسی ایله باغلی فرضییه‌لرین ایر‌لی سورولدویو بیر واختدا سوریا حکومتیندن ایران و اونا باغلی قوه‌لره قارشی محدودیتلرین تطبیقی ایله باغلی گؤستریش وئریلیب.

بئله کی، بشار اسدین قارداشی ماهر اسد کوماندیری اولدوغو سوریا اوردوسونون ۴-جو دیویزییاسینا سپاه عضولری و تهرانین سورییاداکی پروکسی قوه‌لری ایله باغلی تاپیشیریق وئریب.

تاپیشیریغا اساساً ۴-جو دیویزییا ایران و اونا باغلی گروپلارین بو اؤلکه‌نین اراضی‌سیندن استفاده ائد‌رک اسرائیلی هدف آلماسینین قارشی‌سینی آلماق اوچون بیر سیرا تدبیرلر گؤرولوب.

دیویزییانین کوماندیری ماهر اسد ۴-جو دیویزییانین قرارگاهی و بازالاری داخیلینده لیوان حزبوللاهی و ایرانا باغلی گروپلاشمالارینین عضولرینین سلاح-سورسات اؤتورمه‌سینه و یا یئرلشمه‌لرینه مانع اولماغی امر ائدیب.

او، همچینین سورییا بؤلگه‌لرینده یئرلشن قوه‌لر طرفیندن جولان تپه‌لرینده‌کی آمریکا و یا اسرائیل قوه‌لرینین هدف اولماسینین قارشی‌سینین آلینماسینی تاپیشیریب.

بو ایسه علی خامنه‌ای و سپاه-ین بشار اسددن جولان تپه‌لریندن اسرائیله قارشی یئنی جبهه‌نین آچیلماسی ایله باغلی طلبیندن سونرایا تصادف ائدیر.

حماس-ین اسرائیل طرفیندن محو ائدیلمه‌سی، اونون سیاسی بوروسونون رهبری اسماعیل هانییه‌نین اؤلدورولمه‌سینه سورییانین گؤز یومماسی باشا دوشولندیر.

اونا گؤره کی، سورییادا بشار اسده قارشی اعتراض آکسیالارینین باشلادیغی واخت حماس عصیان‌چیلاری دستکله‌ییب، اسدین دئوریلمه‌سی اوچون مختلیف آددیملار آتیب.

همین واخت اسماعیل هانییه اعتراضچیلاری آلقیشلایاراق، اونلارلا همرای اولدوقلارینی بیلدیریب.

آنجاق حزبوللاه فرق‌لی مؤقع توتاراق اسدین حاکمیتده قالماسی اوچون سپاه-لا بیرگه ناراضیلارا قارشی محاربه آپاریب و یوز مینلرله سوریالینین اؤلدورولمه‌سین‌ده، عصیانین یاتیریلماسیندا فعال اشتراک ائدیب.

بوتون بونلارا باخمایاراق دمشقین حزبوللاه-این محو ائدیلمه‌سینه قارشی سس‌سیزلییی، اونا باغلی قوه‌لره محدودیتلر تطبیق ائتمه‌سینین همین قوروم و سپاه-این سورییادا حدیندن آرتیق گوجله‌نمه‌سی ایله علاقلندیریلیر.

احتمال اولونور کی، سپاه و حزبوللاه-ین سوریانین بیر سیرا بؤلگه‌لرینده حتی یئرلی اداره‌چی‌لییه تأثیر و تضییقلری اسد حکومتینین ناراحات‌لیغینا سبب اولوب.

عینی حال‌دا دوشونولور کی، دمشق ۱۰ ایلدن چوخ سوره‌ن داخلی محاربه نتیجه‌سینده داغیلان اقتصادیاتینین برپاسینا، قونشو اؤلکه‌لرله، خصوصاً عرب اؤلکه‌لری ایله سیاسی مناسیبتلرینین یئنی‌دن قورلماسینا داها چوخ اوستونلوک وئریر.

حاضرکی وضعیت‌ده ایرانین سیاسی ماراقلاری اوچون دمشقین داها تهلوکه‌لی یئنی بیر محاربه‌یه ماراقلی اولمادیغی گؤرونور.

قید ائدک کی، تهرانن، خصوصاً سپاه-ین بشار اسددن ناراضی‌لیغی بوندان اوله، سپاه کوماندیرلرینین بو اؤلکه‌ده اؤلدورولمه‌سی دورونه قایدیر.

آپرلین ۱-ده اسرائیلین حربی هوا قوه‌لرینین دمشق‌ده ایران سفیرلیینه یاخین بینایا ائندیردیی ضربه نتیجه‌سینده ۷ سپاه کوماندیرینین هلاک اولماسیندان سونرا ایران رسمیلری آراسیندا سوریایا قارشی مناسیبت سویوماغا باشلاییب.

بیر سیرا ملت وکیللری، حتی سپاه عضولری سورییانین اسرائیله کشفیات معلوماتلاری اؤتوردویو باره‌ده فکرلر سسلندیریب، رسمی دمشقی سپاه کوماندیرلرینین اؤلدورولمه‌سی عملیاتیندا رول اویناماقدا گناهلاندیریبلار.

بوتون بونلار و ماهر اسدین ۴-جو دیویزییایا ایرانین پروکسی قوه‌لری ایله باغلی وئردیی گؤستریش ایرانین اسرائیل قارشی‌سیندا داها دا تکلندیینی و واجیب متفیقینین اوندان اوز دؤندردیینی گؤستریر.