آمریکادا کیمین پرزیدنت سئچیلمه‌سیندن آسیلی اولمایاراق، ایسته‌نیله‌ن دولت باشچی‌سی اؤلکه‌سینین ملی و تهلوکه‌سیزلیک ماراقلاریندان چیخیش ائتمه‌لیدیر. آمریکانین ملی و تهلوکه‌سیزلیک ماراقلاری ایسه جنوبی قفقازدا آذربایجانلا امکداشلیغی دیکته ائدیر.

بو سؤزلری Axar.az-آ پولیتولوگ الخان شاهینوغلو دونالد ترامپین آمریکا پرزیدنتی سئچیلمه‌سینین آذربایجانلا مناسیبتلره تأثیرینی شرح ائدرکه‌ن دئییب.
او بیلدیریب کی، آمریکا آذربایجانین بؤلگه‌ده‌کی رولونو نظره آلیر:

«البته کی، رسپوبلیکاچی دونالد ترامپین پرزیدنت سئچیلمه‌سی آذربایجان اوچون داها مناسب‌دیر. کمالا هاریس ارمنی لوببی‌سینه سیخ باغلی اولان بیریسی ایدی. دوزدور، دونالد ترامپ دا سئچکی عرفه‌سین‌ده ارمنیلره بیر-ایکی وعد وئردی. اما بو، سیاسی مقصد داشیییردی، او، سس قازانماق ایستییردی. ترامپین کئچمیش پرزیدنت‌لییی دؤورونده آذربایجان اراضی بوتؤولویونو تعمین ائتدی. همین دؤورده ترامپین پرزیدنت الهام علیئوه خیلی مکتوبلاری اولموشدو. او، مناسیبتلرین انکشافینا ماراقلی اولدوغونو بیلدیرمیشدی. بو باخیم‌دان حساب ائدیره‌م کی، ترامپین پرزیدنت‌لییی دؤورونده آذربایجان-آمریکا مناسیبتلرینده ایستیلشمه اؤزونو گؤستره‌جک. معین سواللار وار کی، اونلارین دا اورتادان قالدیریلماسینی گؤزله‌یه بیلریک».

قید ائدک کی، ۵ نویابردا آمریکادا کئچیریلن پرزیدنت سئچکی‌سین‌ده رسپوبلیکاچی دونالد ترامپ دموکرات رقیبی کمالا هاریسه غالیب گلیب.