ایران حکومتی اسرائیلین هوا هجوملاری قارشی‌سینداکی عاجیزلییی سببیندن آتشکسله راضیلاشماغا مجبور اولدوقدان درحال سونرا، اؤلکه داخیلین‌ده ناراضیلارا قارشی "عملیات"لارا باشلاییب.

آتشکه‌سین اعلان ائدیلمه‌سیندن کئچه‌ن قیسا مدت عرضین‌ده تهران، همدان، تبریز و باشقا بیر نئچه شهرده اونلارلا نفر حبس ائدیلیب.

بوندان اول ده اولدوغو کیمی ساخلانیلانیلانلارین چوخو "اسرائیل و موساد-لا امکداشلیق"دا گناهلاندیریلیر.

بئله گؤرونور کی، اوزون ایللر نووه و راکت پروگراملارینا خرج‌لنه‌ن ۱۰۰ میلیاردلارلا دلارین بیر نئچه گون عرضین‌ده هوایا اوچماسین‌دان حدت‌لنه‌ن تهران حکومتی، اسرائیل قارشی‌سینداکی عاجیزلیینین آجیغینی وطنداشلاردان چیخماغا باشلاییب.

بو، مغلوبیتین اؤرت-باسدیر ائدیلمه‌سینه، "داخیلی عامللرین مغلوبیتده رول اویناماسی" فکرینی آشیلاماغا حسابلانیب. عینی حالدا هم ده، بوندان سونرا باش وئرمه‌سی گؤزله‌نیه‌ن اعتراض آکسییالارینا قارشی قاباقلاییجی تدبیرلر کیمی نظرده توتولوب.

حبس ائدیله‌نلره قارشی "موساد-لا امکداشلیق" اتهاملارینین ایرل سورولمه‌سی، حاکمیتین همین شخصلرین و بون‌دان سونرا حبس ائدیله‌جک دیگرلرینین اعدامینا زمین یاراتماغا چالیشدیغینا دلالت ائدیر.

بونونلا عینی واختدا ایران عدلیه سیستمینین سؤزچوسو عسگر جهانگیری ده "اسرائیلله محاربه ایله باغلی اتهاملارا گؤره حبس ائدیلن وطنداشلارا جزا نؤولرینی سرتلشدیرمک اوچون جاسوسلوق قانونونا دییشیک‌لیک ائدیلدیینی" بیلدیریب.

ایران حکومتینین بوندان اول اوخشار دوروملاردا تؤرتدیی عمللر، اؤلکه‌ده رپرسیالارین داها دا گوجلنجیی و سیاسی مخالیفلرین کوتلوی اعدامینا دایر ناراحات‌چی‌لیقلاری آرتیریب.

خاطرلاداق کی، ۱۹۸۸-جی ایلین یایین‌دا ایرانین او واختکی رهبری روح‌للاه خمینی عراقلا آتشکه‌سه راضی‌لیق وئردیکدن درحال سونرا دا اوخشار رپرسییالار و کوتلوی اعداملار باشلامیشدی.

اولجه‌دن حبس‌ده اولان و آتشکس‌دن سونرا حبس ائدیله‌ن سیاسی محبوسلار "عراق حکومتی ایله امکداشلیق"دا اتهام اولونوردولار.

تهرانین ائوین و گوهردشت حبسخانالارین‌دا، مشهد، شیراز، اهواز، تبریز و باشقا شهرلرده‌کی حبسخانالاردا خمینی‌نین بیرباشا گؤستریشی و «اؤلوم هیئتی» کیمی تانینان دؤرد نفردن عبارت گروپون تصدیقی ایله بیر نئچه گون عرضین‌ده مینلرله سیاسی محبوس اعدام ائدیلیب.

بونونلا عینی واخت‌دا مینلرله نارازی ساخلانیلیب، بیر نئچه دقیقه‌لیک محاکیمه‌دن سونرا چوخونون باره‌سین‌ده اعدام حکمو وئریلیب.

بو تجروبه‌یه اساساً، رژیمین علی خامنه‌ی و "سپاه"این مغلوبیتینی فرصت کیمی دیرلندیریب ناراضیلارا قارشی کوتلوی رپرسییالارا ال آتاجاغی گؤزلنیلیر.