نیدرلاندلی مشق‌چی تخریبات آلتی کیمی ایستیفاده اولونماق‌دان بئزدیی اوچون اؤلکه‌نی ترک ائتدیینی سؤیله‌یه‌ن ایرانین یئگانه قادین اولیمپییا مئدالیستی کیمیا علیزاده‌نین آلمانییایا کؤچدویونو آچیقلاییب.

آخار. آذ خبر وئریر کی، ۲۰۱۶-جی ایلده ریو ده ژانیرودا کئچیریلن یای اولیمپییا اویونلارین‌دا تائکواندو اوزره یاریشلاردا برونج مدال قازانان آذربایجان اصیل‌لی علیزاده بیر نئچه هفته اول ایران‌دان آیریلاندان سونرا نیدئرلاندین جنوبون‌داکی ایندهوون شهرین‌ده مشقلردن کئچیردی.

نیدرلاندلی میللی تائکواندو مشق‌چی‌سی میمون ائل بوججوفی بازار ائرته‌سی گونو روترس-ا آچیقلاماسیندا بیلدیریب کی، کیمییا فعالیتینه آلمانییادا داوام ائتمک قرارینا گلیب.

آلمانییانین بیلد قزئتی هفته‌سونو علیزاده‌نین کاریئراسینی آلمانییادا داوام ائتدیرمک ایستدیینی و هامبورگا کؤچدویونو آچیقلاییب. علیزاده‌نین همچینین نیدرلاند، کانادا، بلچیکا و بولغاریستان‌دان دا تکلیفلری آلدیغی بیلدیریلیب.

"بیر چوخلاری اونون اوچون مباریزه آپاردی" - دئیه، ائل بوجوفی قید ائدیب.

کیمییا بو آی اینستاگرام-دا "ریاکارلیق، یالان، حاق‌سیزلیق و یالتاقلیغین بیر حیسه‌سی اولماق ایستمدیینی" اوچون "ائو اوچون داریخماغین چتینلیینی" قبول ائتمه‌یه حاضر اولدوغونو یازیب.

"من اونلارین منه دئدیکلرینی گئیینیردیم و دئدیکلرینی ائدیردیم. امر ائتدیکلری هر جمله‌نی تکرارلاییردیم" - دئیه، یازان ایدمان‌چی "هئچ بیریمیز اونلار اوچون اهمیت کسب ائتمیریک، بیز ساده‌جه آلتلریک" سؤزلرینی علاوه ائدیب.