تورکییه آذربایجانین ناخچیوان موختار رئسپوبلیکاسیندا ایستحصال اولونان محصوللارین ایدخالچیلارینی گمروک روسوملارینین اؤدنیشیندن آزاد ائتمه‌یه حاضردیر.

بو باره‌ده ترند-ه تورکییه‌نین ارزاق، کند تصروفاتی و حیواندارلیق ناظری فاروک چئلیک بیلدیریب.

اونون سؤزلرینه گؤره، تورکییه‌نین شرق ویلایتلرینین طلباتینی تعمین ائتمک اوچون سرحدیانی تیجارت چرچیوه‌سینده قونشو اؤلکه‌لردن بیر سیرا ارزاق محصوللاری ایدخال اولونا بیلر: "بونونلا بئله، تورکییه عموم دونیا تیجارت تشکیلارینین قایدالارینا اویغون فعالیت گؤسترملیدیر".

ف.چئلیک قید ائدیب کی، تورکییه ناظیرلر کابینتی اؤتن ایل "سرحدیانی تیجارتین نیظاملانماسی حاقیندا" قرار قبول ائدیب. بو قرارا اساساً، ناخچیواندان اؤلکه‌نین سرحدیانی ویلایتلرینه ایدخال معین ائدیلمیش لیمیت چرچیوه‌سینده حیاتا کئچیریله‌جک:

"بو قرارلا علاقدار اولاراق، ناخچیواندان ایدخال اولونان ماللارا مناسیبتده گمروک روسومونون صیفیر درجه‌سی تطبیق ائدیله‌جک. ناخچیوان تورکییه ایله آذربایجان آراسیندا "بیرلشدیریجی حالقا"دیر. ناخچیوان جغرافی مؤوقعیینه گؤره ایستراتژی اهمیت کسب ائدیر".

قید ائدک کی، بوندان اول آذربایجان اقتصادیات ناظرینین معاوینی ساحل بابایئو ترند-ه ناخچیوان موختار رئسپوبلیکاسیندا ایستحصال اولونان ماللارین تداروکو زامانی گمروک گذشتلری الده ائتمک اوچون تورکییه ایله دانیشیقلار آپاریلدیغینی بیلدیرمیشدی.