شوتلاندییادا تدقیقات‌چیلار ویسکی ایستئحصالیندا ایستیفاده اولونان محصوللاردان ماشینلاری ایشه سالماغین صرفه‌لی یولونو تاپیبلار.

آخار. آذ خبر وئریر کی، هر ایل ۸۲۷ مین تون دنلی آرپا توملاری و ۲ میلیارد لیتر قیجقیردیلمیش قاتی مایعنی توللاماق شوتلاندییانین ویسکی صنایعسینه ۴۰۰ مین دوللارا باشا گلیر. ادینبورگدا فعالیت گؤسترن "کئلتیک رنوابلس" کهنه فرمنتاسییا (قیجقیرتما) اصولوندان ایستیفاده ائد‌رک بو ماینی یاناجاغا چئویرمه‌یه قرار وئریب.

بو یاخینلاردا کئچیریلن نماییشده اونلار بیوبوتانول آدلی تمیز مایعنی عادی فورد ماشینین باکینا تؤکوبلر.

بیوبوتانول ماشینین یاناجاق سیستمینه هئچ بیر دییشیکلیک اولونمادان بنزین قاریشیغینین ۱۵ فایزینی تشکیل ائده بیلر. او همچینین ائتانولدان داها آشیندیریجیدیر و دیزل و بنزینله یاخشی قاریشیر. "کلتیک رنوابلس"این پرزیدنتی مارتین تانقنی توللانتیلاردان یاناجاق دوزلتمیین بؤیوک ایش اولدوغونو بیلدیریب.

«ویسکی ایستحصالیندان چیخان توللانتیلاردان یاناجاق دوزلتمک ایمکانلاری نهنگدیر و بو، اؤلکه‌نین ان بؤیوک صنایعلریندن بیری اولان ویسکی صنایعسینه اقتصادی داواملیلیق گتیرن بؤیوک صنایعیه چئوریله بیلر».

شوتلاندییا حکومتینین مالییه دستیی ایله "کئلتیک رئنئوابلئس" گلن ایل ایللیک یاریم میلیون لیتر بیوبوتانول ایستحصال ائده بیله‌جک زاوود آچماغی پلانلاشدیریر.