تورکییه ایستاتیستیکا کمیته‌سی جاری ایلین یانوار آیی عرضین‌ده بو اؤلکه‌ده خاریجی وطنداشلار طرفین‌دن آلینان منزیللرله باغلی معلومات درج ائدیب. بو ایستاتیستیکا گؤستریر کی، آمریکانین نووه راظیلاشماسین‌دان چیخماسیندان سونرا ایران‌لیلارین تورکییه‌ده ائو آلماسی حاللاری کسکین یوکسلیب.

Axar.az خبر وئریر کی، یانوار آیی عرضین‌ده ایران‌لیلار ۳۰۵ منزیل آلماقلا، عراق‌لیلاردان سونرا ۲-جی یئرده قرارلاشیبلار. بو ایسه ۲۰۱۸-جی ایلین یانوار آیی ایله موقاییسه‌ده ۳.۷ دفعه آرتیم دئمکدیر. آلینان منزیللرین اکثریتی ایستانبول و آنتالیادا یئرلشیر.

ایران‌لیلارین ائو آلماق اوچون تورکییه‌ده نه قدر سرمایه یاتیرماسی معلوم اولماسا دا، اما رسمی آنکارا اؤتن ایل بو اؤلکه‌ده منزیل آلانلارا وطنداشلیق وئریلمه‌سی پروسسینی سادلشدیردییندن، بو رقمی تخمین ائتمک اولار. بئله کی، تورکییه اوللر بو اؤلکه‌نین املاک بازاریندا ان آزی ۱ میلیون دلار اینوستیسییا قویان خاریجیلره وطنداش‌لیق وئریردی‌سه، ۲۰۱۸-جی ایلین یایین‌دان بو رقم ۲۵۰ مین دلارا ائندیریلیب.