انرژی معلوماتلاری و تانکئر ایزله‌مه شیرکتی «کپلئر» طرفین‌دن ۱۱ سئنتیابر، چرشنبه گونو وئریله‌ن ایستاتیستیکایا گؤره، ایرانین ساتیلمایان نفت احتیاطلارینین حجمی کئچه‌ن آی-آوقوستون سونون‌دا گؤرونممیش حده-۱۲۰ میلیون بارئله چاتیب.

اوولکی سانکسییا دؤورون‌ده (۲۰۱۲-۲۰۱۶)، آمریکا انرژی اینفورماسییا آگنتلیینین ایستاتیستیکاسینا گؤره، ایرانین عمومی نفت احتیاطلاری ۵۵ میلیون بارل جیواریندا قیمتلندیریلیر.

آمریکا پرزیدنتی دونالد ترامپ کئچن ایلین مای آیین‌دا نووه سازیشین‌دن چیخیب و بو ایلین مای آیین‌دا ایسلام رسپوبلیکاسینین مشتریلری اوچون نفت گذشتلرینی نفت ایخراجینی صیفیرا ائندیرمک مقصدی ایله لغو ائدیب.

ترامپ ایرانا قارشی و سانکسییالارلا باغلی باراک اوبامانین پرزیدنت‌لیگی دؤورون‌دن داها سرت مؤقع توتوب.

«کپلئر»این ایستاتیستیکاسی گؤستریر کی، بو ایلین مای آیین‌دان آوقوست آیینین سونونا قدر، یعنی دؤرد آی عرضین‌ده ایرانین ساتیلمایان نفت احتیاطلاری ایکی دفعه آرتاراق ۱۲۰ میلیون بارئله چاتیب کی، بونون ۷۰ فایزی سو اوزرین‌ده و تانکرلرده ساخلانیلیب.

«کپلئر»، ایرانین نفت ایخراجینین مینیموما ائندیرمه سیاستینین رئاللاشماغا یاخینلاشدیغینی و اؤتن آی ایسلام رسپوبلیکاسینین جمعی ۱۸۰ مین بارل نفت یوکله‌یه‌رک بازارلارا چیخارا بیلدیینی قید ائدیر.