اورمو مئیوه بازارین‌دا پومیدورون هر کیلوگرامی ۸۰۰ – ۱۲۰۰ تومن (۱۰ – ۱۵ قپیک) آراسین‌دا ساتیلیر کی، بو، اکین‌چیلرین قویدوقلاری خرجی اؤدمیر.

پلانلاشدیریلمامیش فورمادا محصولون اکیلمه‌سی اکین‌چیلرین زررینه سبب اولور.

بئله کی، بیر محصول اگر بیر ایل یاخشی و یوکسک قیمته ساتیلیرسا، گلن ایل تلبات‌دان داها چوخ اکیلیر. آرتیق محصول اکین‌چیلرین الین‌ده قالیر، آلان اولمور و قیمت کسکین دوشور. بو حال‌دا حاضر محصول اونا قویولان خرجی اؤدمیر و اکین‌چیلر هئچ نه الده ائتمیر، اوسته‌لیک زیان گؤرور. اگر بیر محصول بیر ایل بول اولدوغو اوچون ساتیلمیر، زیان وئریرسه، گلن ایل ده اکین‌چیلر بو مهسولو اکمک‌دن چکینیر. بو دفعه باشقا بحران یارانیر: محصول آزلیغی نتیجه‌سین‌ده ایستهلاک‌چیلار نئچه قات قیمت اؤد‌مه‌لی اولور. جاری ایل عرضین‌ده ۸۹ مین تون پومیدور راضیلاشدیریلمیش قیمت اساسین‌دا اکین‌چیلردن آلین‌سا دا، بو پروبلئمین حلینه کؤمک ائتمه‌ییب و پومیدور محصولونون قیمتی دوشمک‌ده داوام ائدیر.

«بو ایل ویلایتیمیزده ۱۹۲ مین تون‌دان چوخ موختلیف سورت پومیدورلار ایستحصال اولوناجاق. کئچه‌ن ایل ایله موقایی‌سه‌ده بو ایل پومیدور اکیمین‌ده ۱۷ فایز آرتیم وار. ان چوخ اورمو، قوشاچای و سایینقالا شهرین‌ده اکیلیب. ویلایتین اهالی‌سینی نظره آلاراق عمومی ایستهلاک ۶۰ مین تون‌دور. قالان اکین‌چیلردن آلینمالی و یا باشقا ویلایتلره ایخراج ائدیلمه‌لی‌دیر»، - قربی آذربایجان کند تصروفاتی تشکیلاتینین رئیسی رسول جلیلی وضعیتی شرح ائدرکه‌ن دئییب.

قید ائدک کی، یوخاریدا گؤستریله‌ن سببلردن دولایی، بو ایل هم اکین ساحه‌سی، هم ده محصولدارلیق‌دا آرتیم اولدوغو اوچون یوکسک سوییه‌ده پومیدور ایستحصال اولونوب. بعضی ویلایتلرده اکین‌چیلرله دؤولت اورگانلاری آراسین‌دا رازیلاشما اساسین‌دا معین قدر محصول اکین‌چیلردن گؤتورول‌سه ده، بو، غربی آذربایجان ویلایتین‌ده آنجاق سؤز و ود اولاراق قالیب. وضعیته باخماق‌دان آیدین گؤرونور کی، هئچ بیر محصولون او جمله‌دن پومیدورون اکیلمه‌سی و ایستحصالی اوچون دؤولت سوییه‌سین‌ده هئچ بیر پلان حاضرلانماییب. اکین‌چی محض اؤزو قرار وئریر کی، هان‌سی محصولو نه قدر عکسین، هان‌سی محصولو اکمه‌سین. بئله اولان حال‌دا نتیجه بل‌لی‌دیر: بیر ایل پومیدور تاپیلمیر، دیگر ایل ایسه پومیدورون آلانی اولمور. همچینین، ایران‌دا اون ایللردیر کی، کووپئراتیو (تااوونی) آدلی تشکیلاتلار تبلیغ اولونور و مینلرله کووپئراتیو یارانیب. حتی بونون اوچون آیریجا بیر ناظرلیک یارانیب. کند تصروفاتی ساحه‌سین‌ده بلکه ده مینلرله کووپئراتیو ایندییه قدر یارانیب، لاکین هئچ بونلار دا اؤلکه‌یه، عضولری اولان اکین‌چیلره بئله هئچ بیر کؤمک ائده بیلمیر.