«قوردلار وادی‌سی» سئریالین‌دا پولاد علمدار رولونو جانلان‌دیران نجاتی شاشمازین قارداشی راجی شاشماز فیریلداقچی‌لیق‌دا تقصیرلندیریلیر.

ایستانبولون فیکیرتپه اراضی‌سین‌ده باشلامادان بیتن «برووکلین» اینشاعات لاییحه‌سی زامانی ضرر چکه‌ن ۱۳۱ نفرین شیکایتی اوزره ایستانبول آنادولو جمهوریت پروکورورلوغونا شیکایت عریضه‌سی تقدیم اولونوب. پول اؤددیکلری حال‌دا منزیللرینی آلا بیلمه‌یه‌ن شیکایتچیلرین عریضه‌سی اساسین‌دا جینایت ایشی باشلانیلیب.

تقصیرلندیریله‌نلر آراسین‌دا «قوردلار وادی‌سی»، «ائشکییا دونیایا حکمدار اولماز» سئریاللارینین پرودوسئر و سناری مؤلفی راجی شاشماز، اونون یاخین قوهومو احمد ماهیر شاشمازین آدی دا وار.

ضررچکه‌نلر آراسین‌دا سابیق میلت وکیلی احسان اؤزکه‌سین ده آدینین اولدوغو مویینلشیب. سابیق دئپوتات اوچ ائوین پولونو اؤددیی حال‌دا هله ده منزیللرین اونا وئریلمدیینی آچیقلاییب.

فیریلداق‌چی‌لیق‌دا تقسیرله‌ن‌دیریله‌ن راجی شاشماز محکمه‌ده ایفاده وئریب:

«اساس ایشیم فیلم و سئریال سئکتورودور. اینشاات ایشلری ایله ماراق‌لانمیرام. بوتون صلاحیت شیرکتین مدیر کؤمک‌چی‌سی کورشات جوشکون اوفوکدا ایدی. مسئولیت اوندا ایدی. ساده‌جه اولاراق گووندییم اوچون منه وئریله‌ن سندلری ایمضالادیم. باش وئره‌نلری ایسه سونرادان اؤیرندیم».

قید ائدک کی، نجاتی و راجی شاشماز یوللارینی ۲۰۱۳-جو ایلده قالماقال‌لی شکیل‌ده آییریبلار. «قوردلار وادی‌سی»نین سناری مؤلفلری کومان‌دادان آیریلدیق‌دان سونرا ایکی قارداش آراسین‌دا موناسیبتلر گرگینلشیب.