باهار بایرامی عادت-عنعنه‌لری، اینانجلاری ایله چوخ زنگین‌دیر.

«شال ساللاماق» و بونون دیگر فورماسی اولان قاشیقلا کاسا چالماق آخیر چرشنبه ایله علاقدار اولان و گئنیش یاییلان عادتدیر. بو عادت قدیم اکینچی طایفالارینین بیری دیگرین‌دن اکین اوچون توخوملوق دن نمونه‌لری توپلاماق عادتینی خاطیرلادیر. هاوا قارالدیقدان سونرا اساساً گنجلر قوهوملارین، تانیشلارین قاپیلارینا گئدیب اللرینده ساخلادیقلاری قابی قاشیقلا ووروب سس سالاردیلار. ائو صاحبی سسی ائشیتجک قاپییا چیخیب ایچری اوزادیلان قابا پای قویور. پای اوچون شیرنی، قورو مئیوه، بزک شئیلری و س. قویولوردو. پای توپلایان نه اؤزونو گؤستریر، نه ده دانیشیردی. اگر او، دانیش‌سای‌دی، پای وئره‌ن بو حرکتی پیس عادت سایاردی.

آخار. آذ خبر وئریر کی، «شال ساللاماق عادتی سوبای گنجلر طرفین‌دن ایجرا اولونان «قورشاق آتدی»، «پاپاق آتدی» و س. مراسیم آیینلرینین مزمونجا عینی‌دیر. آخیر چرشنبه آخشامی اونلار بئل شالی، اؤرپک، کلغایی گؤتوروب سئودیکلری قیزلارین ائولرینه گئدیب، شالی باجادان، دامدان، پنجره‌دن حیطه، ائوه ساللایاردیلار. اگر قیزین آتا-آناسی راضی اولاردیسا، شالی و یا کلغایینی اونون بئلینه، بعضی یئرلرده قولونا باغلاییردیلار. راضی اولماسالار دستمالا شیرنی قویوب گئری قایتاراردیلار.

آخیر چرشنبه و نووروز آخشامی کندین آغساققاللاری ائوینده یاسی اولان، بایرام کئچیره بیلمه‌یه‌ن آداملارین قاپی‌سینی دؤیوب، اونلارا سمنی خونچاسی آپاراردیلار. سمنی خونچاسین‌دا گؤیردیلمیش سمنی، بهمز، میوه، نوغول و س. قویولاردی. سمنی خونچاسینی آپارانلار بوینونا کئچیردیی توربادان حیطده اوینایان اوشاقلارا قوز-فیندیق، یومورتا، کیشمیش، قووورغا وئرردیلر. بو عادتین مقصدی سینیق قلبلری اووون‌دورماق، یاسدا اولان اینسانلارین کؤنلونو آلماق ایدی.