غرب حربچیلری اوکراینا قوشونلارینا تعلیم کئچمکله معاصر محاربه‌دن درسلر آلیرلار. لاکین اونلار اوکراینانین نه ائتدیینی باشا دوشملیدیرلر.

Axar.az خبر وئریر کی، بونو بریگادا گنرالی آتلی مولدی «بیزنس اینسایدر»ا بیلدیریب.

قید اولونور کی، مولدی پولشاداکی «یومسبورگ» دوشرگه‌سینده اوکراینا عسگرلرینه تعلیم وئره‌ن «لگیو» اوپراتیو گروپونون کوماندانی‌دیر.

مولدینین سؤزلرینه گؤره، نروژ اوکراینالیلارلا امکداشلیق یولو ایله تاکتیکا و سلاحلار حاقین‌دا معلومات توپلاییر و سونرا اونلاری نظردن کئچیرمک اوچون اؤز سلاح‌لی قوه‌لرینه اؤتورور.

او بیلدیریب کی، اوکراینانین روسیایا قارشی محاربه تجروبه‌سی چوخ دیرلیدیر، لاکین بیر چوخ ناتو اؤلکه‌سی بونو یانلیش آنلاییر.

مولدی وورغولاییب کی، نروژ اوکراینانین ائتدیی هر شیی تنقیدی آنالیز اولمادان تکرارلایا بیلمز:

"بیز هر گون اوکراینالیلاردان اؤیره‌نیریک. لاکین اوکراینا محاربه‌سیندن درس چیخاراندا اشیتدیکلرینیزی و گؤردوکلرینیزی آنلاماق چوخ واجیبدیر. و بو، چوخلو کونتکست، تجروبه و گؤردوکلرینیز باره‌ده بیلیک طلب ائدیر".