کالیفورنیاداکی فدرال حاکم آمریکا حکومتینین اسرائیله قارشی تنقیدلری یاتیرماق و فلسطینه دستیی محدودلاشدیرماق اوچون دپورتاسیا تهدیدیندن استفاده ائتمه‌سینی کونستیتوسیایا ضد حساب ائدیب.

Axar.az خبر وئریر کی، بو باره‌ده «سی.بی.اس نیوز» معلومات یاییب.

حاکم نوئل وایس فدرال حکومتین آمریکا کونستیتوسیاسی ایله تامین ائدیله‌ن سؤز و مطبوعات آزادلیغی حقوقلارینی پوزدوغونا قرار وئریب.

قراردا بیلدیریلیب کی، ترامپ آدمینیستراسییاسینین ایممیگراسییا سیاستی اجنبی طلبه‌لرین و «ایستنفورد دیلی» قزئتینین امکداشلارینین ایممیگراسییا پروبلملری و دپورتاسیا قورخوسو سببیندن نشرلردن، تاپشیریقلاردان و اجتماعی چیخیشلاردان امتنا ائتمه‌سینه سبب اولوب.

حاکمین سؤزلرینه گؤره، اگر انسانلارا یالنیز حکومت و اونون نماینده‌لرینین تطبیق ائتدیی فکرلری ایفاده ائتمه‌یه اجازه وئریلیرسه، او زمان ایفاده آزادلیغی اؤز معناسینی ایتیریر:

«سؤز آزادلیغی حقوقو انسانلارا خوشاگلمز، موجود سیاسی باخیشلارا ضد اولان و یا اؤلکه‌نین داخلی و خارجی سیاستینه میدان اوخویان فکرلر بیلدیرمک حقوقونو تامین ائدیر».

نشر بیلدیریب کی، بو قرار آمریکا پرزیدنتی دونالد ترامپ آدمینیستراسیاسینا قارشی محکمه ادعاسی قالدیران «استنفورد دیلی» طلبه قزئتی اوچون غلبه اولوب.

«استنفورد دیلی» قزئتینی تمثیل ائد‌ن فردی حقوقلار و ایفاده آزادلیغی فوندو حاکمین قرارینی آلقیشلاییب.

قید ائدک کی، محکمه اوللر ترامپ آدمینیستراسیاسینین آمریکا وطنداشی اولمایان شخصلری فلسطینلیلری دستکله‌دیینه و اسرائیلی تنقید ائتدیینه گؤره هدف آلاراق کونستیتوسییانی پوزدوغونا قرار وئرمیشدی.