زنگزورون شکی کندینه داخل اولان آذربایجانلی حربچی جزاسینین ان آزی بیر حصه‌سینی ارمنستاندا چکه‌جک.

Axar.az خبر وئریر کی، بونو ارمنستانین باش ناظیری نیکول پاشینیان پارلامنتده کئچیریله‌ن حکومت ساعتی زمانی "گوجلو ارمنستان" بلوکونون ملت وکیلی آندرانیک گئورکیانین سوالینی جوابلاندیرارکه‌ن بیلدیریب.

اونون سؤزلرینه گؤره، حادثه ایله باغلی بوتون حقوقی پروسدورلار حیاتا کئچیریلمه‌لیدیر.

"استنطاق آپاریلمالی، ایش محکمه‌یه گؤندریلمه‌لی و محکمه حکم چیخارمالیدیر. بوندان سونرا او، جزاسینین ان آزی بیر حصه‌سینی ارمنستاندا چکمه‌لیدیر"، - دئیه باش ناظیر بیلدیریب.

پاشینیان علاوه ائدیب کی، آذربایجانلی حربچینین گیزلندیی ائوه اولجه اوشاقلار یاخینلاشیبلار. اونلار ائوده یاد آدامی گؤره‌رک بو باره‌ده آنالارینا معلومات وئریبلر. بوندان سونرا قادین پلیسه زنگ ائدیب، لاکن اؤزو حادثه یئرینه گئتمک قرارینا گلیب و پلیسلردن اول اورایا چاتیب.

"بو، کلاسیک کریمینال حکایه‌دیر. اگر اونلار پلیسین گلمه‌سینی گؤزله‌سیدیلر، هئچ نه باش وئرمزدی"، - دئیه پاشینیان علاوه ائدیب.