ایرانین گلستان ایالتینین مرکزی ساییلان گرگان شهرینده پلیس و تهلوکه‌سیزلیک قوه‌لرینین باغ ائولرینین بیرینده کئچیریلن گئجه کامپانییاسینا بیرگه هجومون‌دا داها ۶۰ قیز و اوغلان توتولوب.

آخار. آذ خبر وئریر کی، بو باره‌ده گرگان انقیلاب محکمه‌لرینین صدری عزت الله همزه نژاد ژورنالیستلره آچیقلاماسیندا معلومات وئریب.

همزه نژاد بیلدیریب کی، گرگانین اخلاق تهلوکسیزلیگی پلسی شهرین توسکستان منطقه‌سینده‌کی باغ ائولرینین بیرینده گنج قیز و اوغلانلارین قانونسوز اولاراق بیر آرایا گلمه‌سی بارده خبر توتدوقدان سونرا همین ائوده عملیات کئچیریبلر:

«ویلادا یوخلاما آپارارکن چوخلو آلکوللو ایچکیلر آشکارلانیب. سرخوش وضعیت‌ده بیرلیک‌ده ایلنیب-شنلنن ۶۰ قیز و اوغلان ایسه توتولاراق پلیس بؤلمه‌سینه آپاریلیب. همچینین باغ ائوینین صاحبی و قوناقلیغی تشکیل ائد‌ن شخصلر مسئولیته جلب ائدیلرک باره‌لرین‌ده جینایت ایشی آچیلیب».

عزت الله همزه نژاد حادثه‌نین کونکرت نه واخت باش وئردیینی مئدیایا آچیقلاماییب.

خاطیرلاداق کی، ۲۰۱۶-جی ایلین ایون آیین‌دان بو گونه کیمی ایرانین مختلیف شهرلرینده قیز و اوغلانلارین بیرگه قاتیلدیغی گئجه قوناقلیقلارینا و آد گونلری مراسیملرینه ائدیلن هجوملاردا ۱۱۶۰-دن چوخ آدام حبس ائدیلیب.