آوروپا بیرلیگی پارلامنتینین ۱۵۰-دن چوخ میلت وکیلی بیانات یایاراق، ایراندا کئچیریلن پرزیدنت سئچکیلرینین غیری-دموکراتیک، عدالتسیز و ساختا اولدوغونو بیلدیریب.

آخار. آذ خبر وئریر کی، آوروپا پارلامنتینین یایدیغی بیاناتدا ایرانین ایندیکی آغیر سیاسی دورومونا توخونولاراق، ایراندا مخالیفتین سربست فعالیتینه قاداغا قویولدوغو، مستقیل قولرین بو سئچکیلره قاتیلماسینین قارشیسی آلیندیغی قید ائدیلیر.

«ایرانداکی سئچکیلر آزاد و عدالتلی دئییل. بو سئچکیلر غیری-دموکراتیک و ساختادیر. چونکی اؤلکه‌ده مخالیفتین فعالیتینه تمامیله قاداغا قویولوب. پرزیدنت‌لییه نامیزدلر ایسه اولجه‌دن «ولی فقیهه»، یعنی اؤلکه‌نین دینی لیدرینه اورکدن ایناندیقلارینی اعلان ائتملیدیرلر. همچینین بیر چوخ نامیزدین اؤلکه پرزیدنتلیینه نامیزدلیینی رد ائد‌ن آنایاسایا نظارت شوراسینین عضولری ده بیرباشا ایرانین دینی لیدری علی خامنه ای طرفیندن تعیین ائدیلن شخصلردیر»، - بیانات‌دا بیلدیریلیب.

بیاناتدا همچینین ایرانین ایدیکی پرزیدنتی حسن روحانینین اینسان حقوقلاری ایله باغلی سیاستی تنقید ائدیلیب، اونون پرزیدنت‌لیگی دؤورونده اؤلکه‌ده اعداملارین سایینین کسکین آرتماسی پیسلنیلیب:

«یالنیز حسن روحانینین پرزیدنت‌لیگی دؤورونده‌کی سون دؤرد ایلده ایراندا ۳ مین نفردن چوخ اینسان اعدام ائدیلیب. باخمایاراق کی، روحانینین معتدل بیر سیاست‌چی اولدوغونو دئییرلر. لاکین او، دؤولت تلویزییاسینداکی چیخیشلارینین بیرینده اعدام جزاسینی دستکله‌یه‌رک اونو «اللهین قانونو» آدلانیریب.

بوندان باشقا، ۱۹۸۸-جی ایلده ایراندا سیاسی محبوسلارین کوتلوی اعدامی و قتل عامی اولوب. اعداملار او واخت یارادیلمیش «اؤلوم هئیتی» طرفیندن حیاتا کئچیریلیب. ماراقلی‌دیر کی، سیاسی محبوسلارین اؤلومونه حکم وئره‌ن همین «اؤلوم هئیتی»نین باشچیسی حاضردا پرزیدنت‌لییه نامیزد ابراهیم ریسی، اونون دیگر بیر عضوو ایسه ایرانین ایندیکی عدلیه ناظری مصطفی پورمحمدی اولوب».

بو گون (مایین ۱۹-دا) ایران‌دا ۱۲-جی پرزیدنت سئچکیلری کئچیریلیر. سئچکیلرده دؤرد نامیزد - حسن روحانی، ایبراهیم ریسی، مصطفی میرسلیم و مصطفی هاشمی طبا رقابت آپاریر. اساس رقابت ایسه اصلاحات‌چیلارین دستکلدیی حسن روحانی و دینی لیدر علی خامنه ای نین یاخین آدامی کیمی تانینان ایبراهیم ریسی آراسیندا گئدیر.